Azərbaycandan bu ölkələrin vətəndaşları üçün viza güzəşti
Elektron turist vizalarının verilməsi isiteminin işə düşməsindən sonra Avropadan ölkəmizə gələn turistlərin sayında artım müşahidə olunur. Hal-hazırda elektron vizaların verilməsi ən geci 10 iş günündə həyata keçirilir.
Bu müddətin 5 iş gününə kimi azaldılması üçün Mədəniyyət və Turizm Nazirliyi və Xarici İşlər Nazirliyi birgə Nazirlər Kabinetinə təkliflər göndərib. Bunula bağlı yaxın gələcəkdə qanunvericilikdə dəyişiklik olunacaq.
Bu barədə Mədəniyyət və Turizm Nazirliyinin Turizm şöbəsinin Turizm sənayesi ilə iş sektorunun müdiri Bəxtiyar Qılıncov turzim şirkətləri ilə görüşündə bildirib.
“Elektron viza sistemi fəaliyyətə başladığı gündən bu vaxtadək akkreditasiyadan keçmiş 56 turizm şirkəti tərəfindən 47 477 turist üçün elektron viza rəsmiləşdirilib.
Azərbaycan prezidentinin Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında verdiyi tapşırıqların icrası ilə əlaqədar olaraq, turizm səfərləri və işgüzar əlaqələri təşviq etmək məqsədilə Qətər, Oman, Səudiyyə Ərəbistanı, Bəhreyn, Küveyt, Yaponiya, Çin, Cənubi Koreya, Malayziya və Sinqapur vətəndaşlarına 1 fevral 2016-cı il tarixindən etibarən Azərbaycan Respublikasının bütün beynəlxalq statuslu hava limanlarında sadələşdirilmiş viza rəsmiləşdirilməsi təmin ediləcək”, - deyə o qeyd edib.
Xarici İşlər Nazirliyinin viza şöbəsinin müdiri Elmar Qədimov elektron viza sisteminin fəaliyyətindən danışaraq bu sahədə turizm şirkətlərinə bir sıra tövsiyələr də verib.
Həmçinin qeyd edib ki, 2015-ci il ərzində turizm şirkətləri tərəfindən 24 872 xarici turistə elektron viza verilməsini həyata keçiriblər.
“10 noyabr 2015-ci il tarixindən etibarən Birləşmiş Ərəb Əmirliklərinin vətəndaşlarına sadələşdirilmiş viza rejimi tətbiq edilib. Həmin vaxtdan bu günə kimi 3 min nəfərdən çox Birləşmiş Ərəb Əmirliklərinin vətəndaşı ölkəmizə turist səfəri edib”, - deyə E.Qədimov qeyd edib.
