SOCAR özəlləşdiriləcəkmi?
"Neftin ucuzlaşması uzun müddət davam edə bilməz"
Ölkə.Az azvision.az-a istinadən xəbər verir ki, bunu jurnalistlərə açıqlamasında energetika naziri Natiq Əliyev deyib. Onun sözlərinə görə, neftin indiki ücuz qiyməti iqtisadi səbəblərlə deyil, siyasi səbəblərlə əlaqəlidir və bu, uzun müddət davam edə bilməz.
Azərbaycanın enerji sektorunda fəaliyyət göstərən müəssisələr xeyli köhnəlib və onların çox böyük investisiyalara tələbatı var deyən N.Əliyev bildirib ki, həmin müəssisələri fiziki şəxslər özəlləşdirə bilməz:
"SOCAR-ın özəlləşdirilməsindən söhbət gedə bilməz. Bunu cənab Prezident də deyib. Digər enerji müəssisələrindən isə yalnız köməkçi qurumlar özəlləşdirilə bilər. Amma həmin müəssisələr köhnədir və böyük investisiya tələb edir. Təxminən 4 mlrd. dollar investisiya lazımdır. Bunu isə fiziki şəxs edə bilməz. Ancaq hansısa şirkət bunu edə bilər. Yaxud biz onların özəlləşdirilməsi üçün başqa yollar tapmalıyıq".
N.Əliyev həmçinin əlavə edib ki, Cənub Qafaz Boru Kəməri ilə bağlı işlərin də çox hissəsi bitib: "Son bir ildə Cənubi Qafqaz Boru Kəməri üzrə boruların 20%-i artıq inşa edilib. Gürcüstanda kompressor stansiyalarının quraşdırılmasına başlanılıb. Biz də, BP də dəfələrlə elan etmişik ki, işlər qrafikdən daha sürətlə gedir.
Həmçinin, TANAP layihəsi üzrə işlərin çox hissəsi görülüb. Boruların gətirilməsi başa çatıb. Hər üç lot üzrə boruların qaynağına başlanılıb. TAP layihəsi üzrə də hökumətlərlə sənədlər imzalanıb. Düzdür, bəzi lokal problemlər yaranmışdır. Lakin onlar da həll edilir. Bizə önəmli olan ətraf mühitə təsirlə bağlı sənəd idi ki, o da artıq imzalanıb. Məşvərət Şurasının iclasında gələcəkdə yarana biləcək problemlərin aradan qaldırılmasını müzakirə edəcəyik".
