BP-nin gəlirləri 91% azaldı

Dünyanın aparıcı neft-qaz şirkətlərindən olan BP 2014-cü ilin 4-cü rübü ilə müqayisədə 2015-ci ilin anoloji dövründə zərərinin artdığını bildirib. 

 Ölkə.Az oxu.az-a istinadən xəbər verir ki, BP zərərin artmasına səbəb olaraq neftin qiymətlərindəki sürətli ucuzlaşmanı, neft axtarışı və istehsalının maya dəyərinin bahalı başa gəlməsi və yenidənqurma xərclərini əsas göstərib. 

BP neftin qiymətinin kəskin ucuzlaşması ilə əlaqədar olaraq, 2015-ci ildə 6,5 milyard dollar zərər etdiyini qeyd edib. Şirkət 2014-cü ildə isə 3,78 milyard dollar xalis mənfəət açıqlamışdı. 

Şirkət ötən ilin son rübündə 2,6 milyard dollar zərər etdiyini, mənfəətin isə 91% azaldığını açıqlayıb. Şirkətin 2015-ci ilin 4-cü rübün gəlirləri 196 milyon dollar təşkil edib. 2014-cü ilin anoloji dövründə isə şirkət 2,2 milyard dollar gəlir qazanıb. 

BP bununla bağlı olaraq yeni islahat planında 7 min işçini ixtisar edəcəyini açıqlayıb.

Belə ki, BP, neft, təbii qaz axtarış və istehsal fəaliyyətlərini əhatə edən upstream əməliyyatlarında çalışan işçi və podratçı sayını 2016-ci ildə 4 min nəfər azaltmağı hədəfləyir. 

Bundan başqa, şirkət 2017-ci ilə qədər isə neft-qaz emalı və ticarət əməliyyatlarında çalışan işçilərin 3000-i ixtisar edəcəyini qeyd edib. 

 Ölkə.Az