Əbülfəs Qarayev turizmçilərə tapşırıqlar verib
Mədəniyyət və turizm naziri Əbülfəs Qarayev Azərbaycan turizm sənayesinin aparıcı nümayəndələri ilə görüş keçirib.
Bu barədə nazirlikdən Ölkə.Az-a bildirilib.
Görüşdə Nazirliyin əməkdaşları ilə yanaşı, Azərbaycan Turizm Assosiasiyası, Azərbaycan Konqreslər Bürosu, Azərbaycan Sağlamlıq və Termal Turizminə Dəstək, Kənd Yaşıl Turizminin İnkişafına Dəstək İctimai Birliklərinin rəhbərləri, aparıcı turizm şirkətləri və mehmanxana rəhbərləri iştirak edib.
Nazir çıxışında son illər qeyri-enerji sektorunun inkişafında turizm sahəsinin prioritet olmasından söz açmış, növbəti illərdə də turizm sənayesinin yeni mərhələdə inkişaf etdirilməsinin vacib olduğunu vurğulayıb.
O bildirib ki, Azərbaycan Prezidenti İlham Əliyevin diqqət və qayğısı digər sahələrdə olduğu kimi, turizm sahəsində də öz bəhrəsini verib və bu sahədə bir sıra Dövlət proqramları təsdiq edilib.
Ölkə başçısının çıxışlarında mütəmadi olaraq, normativ hüquqi bazanın yenilənməsinə, 2013-cü ildən etibarən digər turizmin inkişaf etmiş ölkələrdə olduğu kimi elektron viza sisteminin tətbiq edilməsinə, turizm sahəsində prioritet olan ölkələrin təcrübəsinə əsasən hava limanlarında vizanın verilməsi məsələlərinin diqqətində olmasını vurğulayıb.
Daha sonra nazir turizm sənayesi nümayəndələrinin Assosiasiya rəhbərləri ilə yeni turizm məhsullarının yaradılması istiqamətində birgə işlər həyata keçirilməsi ilə bağlı tapşırıqlar verib.
Azərbaycana turistlərin cəlb olunması üçün yaradılacaq yeni turizm məhsulunun indiki mərhələdə vacibliyi qeyd olunub.
Eyni zamanda hər 4 Assosiasiyanın vahid, koordinasiya olunmuş qaydada turistlərin cəlb olunması üçün birgə fəaliyyət göstərmələrinin və fəaliyyət planlarının əhəmiyyəti də müzakirə edilib.
Nazir kino sənayesinin də turizmin inkişafındakı əhəmiyyətli rolundan danışaraq bildirib ki, bir sıra dünya ölkələrinin təcrübəsində olduğu kimi Azərbaycanda da filmlərin çəkilişləri üçün təbiət, iqlim və bütün texniki baza imkanları mövcuddur.
Bu istiqamətdə xarici ölkələrin kino sənayesi ilə məşğul olan şirkətlərinin filmlərinin Azərbaycanda çəkilişlərinin həyata keçirilməsi üçün Cəfər Cabbarlı adına “Azərbaycanfilm” kinostudiyası ilə turizm sənayesi nümayəndələrinin birgə əməkdaşlıq etməsinin vacib olduğunu vurğulayıb. Bu fəaliyyətin yeni turizm məhsulunun inkişaf etdirilməsi baxımından mühüm əhəmiyyətə malik olduğunu bildirib.
Nazir qeyd edib ki, turizm sahəsi müasir texnologiya dünyasından geri qalmamalıdır. Turizmin inkişafında elektron texnologiyalardan istifadə edilməli və bu sahədə yeni nəticələr əldə olunmalıdır.
Mədəniyyət və Turizm Nazirliyinin layihəsi olan “GoMap”in son dövrlər turizm sahəsinə verdiyi töhfələr buna misal ola bilər. Bu layihənin daha da geniş tanıdılması və inkişaf etdirilməsi istiqamətində turizm sənayesi nümayəndələrinin də aktivlik göstərməli olduğu bildirilib.
Həmçinin, nazir Azərbaycan Turizm və Menecment Universitetinin və Bakı Turizm Peşə Məktəbi ilə turizm sənayesinin sıx əməkdaşlıq qurmasının vacibliyini vurğulayıb və bu çərçivədə treninq, seminar, yay məktəblərinin təşkil olunması kimi məsələləri müzakirə edib.
Daha sonra turizm sənayesi nümayəndələrinin təklifləri dinlənilib və fikir mübadiləsi aparılıb.
