Azərbaycan və İran gömrük məsələlərində razılığa gəldilər
Biləsuvar və Astara sərhəd-keçid məntəqələri 24 saat işləyəcək.
Bu barədə Dövlət Gömrük Komitəsindən (DGK) Ölkə.Az-a bildirilib.
Məlumata görə, Azərbaycan, İran, Naxçıvan tərəfinin iştirak etdiyi rəsmilər gömrük qanunvericiliyinə edilən dəyişikliklər barədə mümkün qədər qısa zamanda məlumat mübadiləsinin həyata keçirilməsi, Biləsuvar və Astara sərhəd-keçid məntəqələrinin 24 saat işləməsi barədə razılığa gəliblər.
Bundan başqa, İranın Biləsuvar sərhəd-keçid məntəqəsinin yük xəttinin cümə günləri fəaliyyət göstərməsi, eləcə də hər iki ölkənin ərazisində müvafiq tranzit daşımaları zamanı ortaya çıxan problemlərin aradan qaldırılması istiqamətində işlərin davam etdirilməsinə dair də razılığa gəlinib.
Tərəflər Gömrük məsələlərində qarşılıqlı inzibati yardım haqqında hökumətlərarası sazişin layihəsini də razılaşdırıblar.
Həmçinin əldə edilmiş razılığa görə, Azərbaycandan İran ərazisinə və əks istiqamətdə keçən mallar barədə elektron məlumat mübadiləsi aparılacaq.
Bu isə sərhəd-keçid məntəqələrində gömrük rəsmiləşdirilməsi prosesinin və avtomaşınların keçidinin sürətlənməsinə şərait yaradacaq, düzgün bəyan etməmə kimi halların qarşısı alınacaq.
