“SOCAR Turkey Energy”nin rəhbərindən 80 min manat oğurladılar
Azərbaycanın Dövlət Neft Şirkətinin (SOCAR) Türkiyədə fəaliyyət göstərən törəmə şirkəti "SOCAR Turkey Energy" şirkətinin baş icraçı direktoru Kənan Yavuz fırıldaqçılığın qurbanı olub.
Ölkə.Az Türkiyənin “Vətən” qəzetinə istinadən xəbər verir ki, K. Yavuz ticarət mərkəzində olarkən kredit kartı ilə alış-veriş etmək istəyərkən problemlə üzləşib. Daha sonra K.Yavuz bankla əlaqə saxlayıb.
Bank rəsmisi isə “itdiyi üçün kartı ləğv etdirmisiniz, yeni kredit kartını sizin ünvanınıza göndərmişik”, - deyib.
K. Yavuz isə bildirib ki, banka heç bir müraciət etməyib. Aparılan araşdırma nəticəsində iş adamının bağlatdırdığı kartdan 150 min türk lirəsi (təxminən 80 min manat) pulun çıxarıldığı aydınlaşıb.
Məlum olub ki, şəxsiyyəti naməlum olan şəxs K.Yavuzun şəxsi məlumatları ilə bankın nümayəndəliyinə müraciət edərək, özünü iş adamı kimi təqdim edib.
Özünü iş adamı Kənan Yavuz kimi təqdim edərək kredit kartı alan şübhəli şəxsin müəyyənləşdirilməsi üçün təhqiqat başlayıb.
Artıq hüquq-mühafizə orqanları hadisəni törətməkdə şübhəli bilinən şəxsləri müəyyənləşdiriblər.
