Bank lisenziyasını yeni yaradılan palata verəcək
Azərbaycan Mərkəzi Bankının (AMB) nəzarət və lisenziyalaşdırma səlahiyyəti sadəcə məhdudlaşdırılmır, ümumiyyətlə, əlindən alındı.
Bu qanun qüvvəyə mindikdən sonra, AMB banklara nəzarət etməyəcək, lisenziya verməyəcək. Bu artıq Maliyyə Bazarlarına Nəzarət Palatasının işi olacaq. AMB yalnız pul siyasətinin həyata keçirilməsi işi, yəni, qiymətlərin sabitliyi, inflyasiyanın qarşısının alınması və məzənnə ilə məşğul olacaq.
Bu barədə Ölkə.Az-a açıqlamasında banklar üzrə mütəxəssis Əkrəm Həsənov bildirib.
Onun sözlərinə görə, yeni qərar qabaqcıl dünya təcrübəsinə uyğundur:
“Mərkəzi Bankın işi bundan ibarət olacaq və bu da prinsipcə qabaqcıl dünya təcrübəsinə uyğundur. AMB yalnız bununla məşğul olmalıdır. Ən qabaqcıl ölkələrdə Mərkəzi Bank bank nəzarəti ilə məşğul olmur. Səlahiyyətlər bu yaxınlarda fəaliyyətə başlayacaq Maliyyə Bazarlarına Nəzarət Palatasına keçəcək.
Ümumiyyətlə, maliyyə bazarlarına, yəni bank, sığorta, qiymətli kağızlar bazarına məhz vahid dövlət qurumu nəzarət etməlidir. Bu, dünya praktikasına uyğun olacaq. Biz də bu praktikanı qəbul edirik. Hesab edirik ki, bu tamamilə düzgün addımdır. Təbii ki, bu yalnız formasıdır. İndi Palatanın məzmunu necə olacaq? Fəaliyyəti effektiv olacaqmı? Bunu vaxt və zaman göstərəcək. Amma bütövlükdə bu düzgün addımdır.
Palatanın gələcək rəhbərliyi əgər düzgün iş qursa, düzgün siyasət yürütsə, ümid edirəm ki, ölkədəki maliyyə vəziyyəti sağlamlaşmağa doğru gedəcək. Bu, bu istiqamətdə atılan yalnız ilk addımdır. Ümid edirəm ki, uğurlu olacaq”, - deyə Ə.Həsənov açıqlamasında qeyd edib.
O həmçinin əlavə edib ki, bankların lisenziya alması çətinləşməyəcək, proses olduğu kimi qalıb:
“Prinsipcə bu edilən dəyişikliyə görə, lisenziya almaq prosesinə heç bir dəyişiklik edilməyib. Proses eyni prosesdir. Yalnız lisenziyanı artıq AMB deyil, Palata verəcək. Amma ola bilər ki, gələcəkdə Palata qanuna dəyişikliklər etsin. Hesab edirəm ki, banklar haqqında qanuna növbəti dəfə də dəyişdirilməsinə ehtiyac var”.
Qeyd edək ki, bu gün Mlli Məclisin keçirilən plenar iclasında “Azərbaycan Respublikasının Mərkəzi Bankı haqqında” Qanununda dəyişikliklər edilməsi barədə” qanun layihəsi qəbul edilib.
Dəyişikliklə, Mərkəzi Bank ölkənin bank sisteminin sabit işini təmin etmək, bank kreditorlarının və əmanətçilərinin maraqlarını qorumaq məqsədilə bank fəaliyyəti üzərində lisenziyalaşdırma, tənzimləmə və nəzarət funksiyalarını itirib.
Xatırladaq ki, bir müddət öncə Azərbaycan Prezidenti İlham Əliyev Maliyyə Bazarlarına Nəzarət Palatası publik hüquqi şəxsin yaradılması haqqında fərman imzalamışdı.
