SOCAR-AQŞ yeni platformada qazma işlərinə başlayır
İlk dəfə olaraq 3000 at gücündə qazma qurğusundan istifadə ediləcək.
Bu gün SOCAR-ın prezidenti Rövnəq Abdullayevin başçılığı ilə geniş tərkibli nümayəndə heyəti ‘’Günəşli ‘’yatağında yeni inşa edilmiş 7 saylı dərin dəniz stasionar özülünün (DDSÖ) istismara verilməsi mərasimində iştirak edib.
Bu barədə şirkətdən bildirilib.
7 saylı özüldə həyata keçirilən işlərlə tanışlıq zamanı qazma meydançasında quraşdırılan yeni avadanlığa baxış keçirən SOCAR prezidentinə respublikamıza ilk dəfə gətirilən yeni nəsil qazma qurğuları haqqında ətraflı məlumat verilib.
Belə ki, SOCAR-AQŞ yeni özüldə 2 müxtəlif qazma qurğusundan istifadə edərək quyu tikintisi işlərinə başlayacaqdır.Yeni özüldə ilkin mərhələdə 6 qaz və 14 neft quyusunun qazılması nəzərdə tutulub.
Qazma qurğularından biri-Hong Hua ZJ 70/4500 DZ-nin quraşdırılması artıq tam yekunlaşmışdır. Digər qazma qurğusu Almaniya istehsalı olan Bentec 3000 HP isə yaxın vaxtlarda quraşdırılaraq istifadəyə veriləcək.
Qeyd etmək lazımdır ki, Bentec 3000 HP Azərbaycanda anoloqu olmayan yeni nəsil qazma avadanlığı olmaqla bir sıra üstünlüklərə malikdir. 3000 at gücünə malik qazma qurğusunun istifadəsi nəticəsində yatağın məhsuldar laylarında dərinliyi 9000m-dən artıq olan böyük inhiraflı quyuların qazılması üçün nadir imkan yaranacaqdır.
Bentec 3000 HP qurğusunun unikal texniki göstəricilərindən biri də düşən obyektlərdən mühafizə sistemləri ilə təchiz olunmasıdır. Bu sistemlərin fəaliyyəti nəticəsində konstruksiyada düşməsi mümkün olan hissələrin əlavə sığortalanması avtomatik həyata keçirilir.
Ekoloji və iqtisadi cəhətdən səmərəli olan yeni avadanlıq həmçinin yüksək səs izolyasiyasına malikdir.Bu avadanlığın tətbiqi quyuların vaxtından tez qazılması ilə yanaşıən mürəkkəb quyuların qazılmasına imkan yaradacaqdır.
SOCAR prezidenti Rövnəq Abdullayev qazma meydançasında həyata keçirilən işlərdən məmnunluğunu ifadə edərək, SOCAR-AQŞ rəhbərliyinə işlərində yeni uğurlar arzu edib.
Daha sonra Rövnəq Abdullayev yataqda qazılacaq ilk istismar quyusunda qazma qurğusu- Hong Hua ZJ 70/4500 DZ-ni işə salan düyməni basaraq yeni özüldə qazmaya başlanmasına start verib.
SOCAR prezidenti neftçilər qarşısında çıxış edərək bildirdi ki, yeni özülün ərsəyə gəlməsində komanda işinin düzgün qurulması böyük rol oynayıb.
Özüldə fəaliyyət göstərən təmir-tikinti, qazma, mədən və müxtəlif servis şirkətlərinin nümayəndələrinə işlərində uğurlar arzulayan R. Abdullayev ‘’Günəşli’’ yatağında hasilat və nəql infrastrukturunun genişləndirilməsi istiqamətində aparılan kompleks tədbirlərin əhəmiyyətindən danışıb.
