Sahibkarın biznes ərazisinə baxış keçirilməsi şərtləri dəqiqləşdirildi
Sahibkarın hüququ pozulmamalıdır.
“Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Qanunda dəyişikliklər edilmişdir. Dəyişikliklərə əsasən yoxlamalar zamanı sahibkarın fəaliyyət üçün istifadə etdiyi istehsal və emal müəssisələrinə, anbarlara, satış sahələrinə və xidməti nəqliyyat vasitələrinə baxış keçirməsinin hədləri müəyyən edilmişdir.
Hüquqşünas Oktay Məhərrəmovun Ölkə.Az-a bildirdiyinə görə mütərəqqi xarakter daşımaqla bu qanun formal olaraq sahibkarların yoxlama zamanı baxış keçirmək istəyən yoxlayıcıya mane olmamaq vəzifəsini müəyyənləşdirsə də, baxışın keçirilmə şərtləri və sahibkarın hüquqlarına riayət edilməli olması dəqiq və birmənalı olaraq təsbit edilmişdir.
Qüvvədə olan qanunvericiliyə əsasən yoxlayıcılar yoxlama tədbirlərinin tam görülməsi üçün və faktiki məlumatın təqdim olunan sənədlərdə olan məlumatla uyğunluğunu müəyyən etmək üçün sahibkarın öz fəaliyyətində istifadə etdiyi ərazilərə - istehsal və emal müəssisələrinə, anbarlara, satış sahələrinə və xidməti nəqliyyat vasitələrinə baxış keçirmək hüququna malikdir.
Dəyişikliyə əsasən i) yoxlama başlamazdan əvvəl yoxlayıcı xidməti vəsiqəsini, yoxlamanın aparılması haqqında qərarın surətini və yoxlamanın yoxlamaların vahid məlumat reyestrində qeydiyyata alınması barədə çıxarışı təqdim etməzsə, yoxlamanın hüquqi əsasları, predmeti, müddəti, yoxlama zamanı tərəflərin hüquq və vəzifələri haqqında məlumat verməzsə ii) yoxlama müddətlərinə riayət edilməzsə iii) yoxlama sahibkarın iş vaxtında və iş günlərində onun fəaliyyət göstərdiyi ünvanda aparılmazsa, sahibkarın normal iş rejimini pozarsa iv) yoxlayıcı texniki vasitələrdən (audio, video və foto avadanlıqlarından, surətçıxarandan və skanerdən) istifadə etmək qərarını verdikdə bu barədə sahibkara imzası alınmaqla məlumat verməzsə v) sahibkarın yoxlama zamanı foto, video çəkiliş və audio yazılış aparmaq hüququ pozularsa vi) sahibkar yoxlamada köməklik göstərilməsi üçün istədiyi şəxsləri dəvət etmək hüququ pozularsa sahibkarın yoxlayıcını özünün biznes ərazisinə baxış keçirməsi üçün buraxmaqdan imtina etməsi qanuni hesab ediləcəkdir. Bu hallar yoxdursa sahibkar yoxlama prosesində baxış keçirilməsinə mane olmamalıdır.
Onu da qeyd etmək lazımdır ki, yeni qüvvəyə minmiş İnzibati Xətalar Məcəlləsinin 602.3-cü maddəsinə əsasən yoxlayıcı orqan və ya yoxlayıcı tərəfindən yoxlamalarla bağlı müəyyən edilmiş tələblərin və prosedurların pozulmasına görə vəzifəli şəxslərin
beş yüz manatdan min beş yüz manatadək məbləğdə cərimə edilməsi nəzərdə tutulmuşdur.
Eyni zamanda həmin Məcəllənin 602.4-cü bəndinə əsasən sahibkar tərəfindən yoxlama prosesində sahibkarlıq fəaliyyəti üçün istifadə olunan əraziyə baxış keçirilməsinə mane olmağa görə sahibkar min manatdan min beş yüz manatadək məbləğdə cərimə edilə bilər.
