Parisdə Azərbaycanın turizm imkanları təqdim olunub
Avropa Azərbaycan Cəmiyyətindən (TEAS) verilən məlumata görə, Eyfel qülləsinin yaxınlığında yerləşən Azərbaycanın Fransadakı səfirliyinin Mədəniyyət Mərkəzində baş tutan tədbir “Nomade Aventure” səyahət agentliyi tərəfindən Avropa Azərbaycan Cəmiyyətinin Fransa ofisi ilə əməkdaşlıq şəraitində təşkil edilib.
Tədbirdə Azərbaycana səfər etmək arzusunda olan 120-dək potensial turist iştirak edib. Onlar Azərbaycan mədəniyyəti, tarixi və turizm imkanları haqqında müfəssəl məlumatlar əldə etmək istəyində olduqlarını vurğulayıblar. Məlumat xarakterli tədbirə “Nomade Aventure” agentliyinin ənənəvi partnyoru “Ukrayna Hava Yolları” dəstək verib. Təşkilatçılar Bakıya uçuş biletlərini lotereya vasitəsilə, “Qafqaz Bakı Sport” və “Qafqaz Point” otelləri isə udan şəxslərə oteldə iki gecəlik qalmaq imkanı təklif ediblər.
Tədbirdə çıxış edən Azərbaycanın Fransadakı səfirliyinin iqtisadi məsələlər üzrə məsləhətçisi Elmar Məmmədov turizm inkişafının ölkəmiz üçün prioritet sahə olduğunu vurğulayaraq qeyd edib ki, “Nomade Aventure” agentliyi yeni turizm marşrutu kimi məhz Azərbaycanı seçib.
Azərbaycanın turizm potensialı haqqında bəhs edən Avropa Azərbaycan Cəmiyyətinin Fransa ofisinin direktoru Marie-Laetitia Gourdin Azərbaycanın zəngin mədəniyyəti, tarixi irsi və ölkəyə səfərlərlə bağlı bəzi praktiki məlumatlar verib. Vaxtilə Fransanın Azərbaycandakı səfirliyində çalışan tanınmış fransız bəstəkarı Pyer Tilloy isə ilk dəfə 2001-ci ildə səfər etdiyi ölkə ilə bağlı təəssüratlarını bölüşüb. O, böyük həvəslə ləziz Azərbaycan mətbəxinin şöhrəti haqqında söz açaraq heyrətamiz yeməklərimizdən dadmaq üçün hansı ünvanlara üz tutmağı tövsiyə edib. “Xocalı 613” əsərinin müəllifi ölkəmizin tarixi yerləri, əsrarəngiz təbiəti, təbiət guşələri, turistik marşrutları haqqında məlumat da verib.
Azərbaycanın turizm imkanlarının təqdimatından sonra Mədəniyyət Mərkəzində təşkil olunan sərgiyə baxış keçirilib. Burada iştirakçılar artefaktlar və Azərbaycan rəssamlarının işləri vasitəsi ilə ölkənin mədəniyyət inciləri ilə tanış olublar. Ardınca auditoriya qarşısında pianoçu Etibar Əsədli və balabançı Səddam Novruzbəyli konsert proqramı ilə çıxış ediblər. Konsert və lotereya oyunundan sonra iştirakçılara ənənəvi Azərbaycan paxlavası və şəkərbura, sağlam və enerji verən nar şirəsini dadmaq təklif olunub. Təşkilatçılar məmnuniyyətlə qeyd ediblər ki, artıq bir neçə iştirakçı Azərbaycana səfər təşkil olunmasını istədiklərini bildiriblər.
