“Azərbaycan neft hasilatının dondurulmasına razıdır”

Xəbər verdiyimiz kimi, bu gün Qətərin paytaxtı Dohada neft istehsal edən ölkələrin nümayəndələri Rusiyanın hasilatı “dondurmaq” barədə təklifini müzakirə edirlər. 

Ölkə.Az AzərTac-a istinadən xəbər verir ki, Azərbaycanı görüşdə energetika naziri Natiq Əliyev təmsil edir.

N.Əliyev jurnalistlərə müsahibəsində bildirib ki, Azərbaycan neft hasilatının dondurulmasına razıdır. Onun sözlərinə görə, Azərbaycan Dohada neft ixrac edən digər ölkələrlə razılaşmanı imzalamaq niyyətindədir. Energetika naziri deyib ki, razılaşma imzalandıqdan sonra neftin qiyməti 2016-ci ilin sonunadək 50 dollara çatacaq. Qiymət nə qədər yüksək olsa, o qədər yaxşıdır. Gələn il isə bizim üçün münasib səviyyə bir barel üçün 60 dollardı. Hasilatı dondurmaq istəyən ölkələrlə yanaşı, bu qərarı dəstəkləməyənlər də var.

Aprelin 17-də İranın Milli Neft Şirkətinin icraçı direktoru Rüknəddin Cavadi bildirib ki, bu ölkədə neft hasilatının gündəlik həcmi 3,5 milyon bareldir. Yaxın günlərdə isə İran neft satışının həcmini 2 milyon barelə çatdıracaq.