AİB Azərbaycana kömək edəcək
İyunun 22-də Asiya İnkişaf Bankının (AİB) Direktorlar Şurasında Azərbaycana növbəti kreditin ayrılması məsələsi müzakirə olunacaq.
Ölkə.Az “Report”-a istinadən xəbər verir ki, bu barədə Nariman Mannapbekov məlumat verib.
Onun sözlərinə görə, təmsil etdiyi bankın Azərbaycana enerji təchizatının yaxşılaşdırılması layihəsinin icrası üçün ayırmaq istədiyi kreditin ümumi həcmi 750 milyon dollardır.
İlkin mərhələdə hökumətə bunun 250 milyon dolları çatacaq:
“Bu pul Bakı istisna olmaqla bütün ölkəyə ayrılacaq. Birinci tranş hesabına yarımstansiyalar üçün avadanlıqlar - transformatorlar, paylayıcı vasitələrin alınması və quraşdırılması, eləcə də əhalinin sayğaclarla təmin edilməsi nəzərdə tutulub”.
N.Mannapbekov kreditin hansı şərtlərlə ayrılacağı barədə də danışıb:
“Bu kredit ilk 5 ili güzəştli olmaqla 25 il müddətində 6 aylıq Libor + təxminən 0,4% dərəcəsi ilə ayrılacaq. Kreditləşməyə dair bütün sənədlər müqavilə bağlanandan sonra təxminən iki həftə ərzində bankın saytında yerləşdiriləcək”.
