Abid Şərifov: Sosial evlər üçün 10 milyon manat ayrılıb

“Sovetski”də evlərin hansı vəziyyətdə olması hər kəsə məlumdur. Mənim tələbəlik illərim orada keçib. Artıq oradan köçən insanlar, heç olmasa normal hava qəbul edir və rahat şəraitdə yaşayırlar. Mən hamını deyə bilmərəm, amma əmin edirəm ki, “Sovetski”dən köçən insanların böyük əksəriyyəti bununla razıdır”.

Ölkə.Az ANS TV-yə istinadən xəbər verir ki, bu sözləri “Hesabat” verilişində Mir Şahinin suallarını cavablandıran baş nazirin müavini Abid Şərifov bildirib.

Nazir müavini “Sovetski”də sökülən mənzillərdən və sökülməsinə etiraz edilən tarixi abidələrdən danışıb. 

Siyahıya düşən tarixi abidələrin sayının 23 olduğunu, onlardan artıq 11-nin söküldüyünü qeyd edən qonaq Azərbaycanda qəbul olunmuş qaydalara uyğun olaraq, xüsusi rəylər əsasında bu abidələrin siyahıdan çıxarıldığını bildirib.

“20 minlik şəhəri köçürmək, 3 min 750 evi sökmək, həm də qısa müddətdə asan məsələ deyil. Əlbəttə, şikayətçilər var. Problemlər, əsasən, ondan ibarətdir ki, məsələn, şəxs 50-60 il əvvəl öz evini kiməsə ya bağışlayıb, ya da satıb. Bu tipli qarışıq məsələlər var. Bütün bu kimi məsələlərin yoluna qoyulması üçün çalışırıq”,- deyə Abid Şərifov bildirib.

Aprelin əvvəlində Ermənistan tərəfinin cəbhəyanı kəndlərdə yaşayan əhalini atəşə tutması nəticəsində dəyən ziyan və bu ziyanın aradan qaldırılması istiqamətində görülən işlərdən danışan nazir müavini Ağdam, Tərtər, Goranboyda 300-dən çox evin təchizatla təmin olunduğunu, 30-a yaxın dağılmış evin isə bir aya qədər tamamlanma işlərinə yekun vurulacağını qeyd edib. 

Onun sözlərinə görə, bəzi evlər təmir olunub, bəziləri isə sökülərək yerində yenisi inşa edilib. Bir məktəbin təmiri yekunlaşıb və təhvil verilib.

Daha sonra baş nazirin müavini tikilməsi nəzərdə tutulan sosial evlər layihəsi ilə bağlı da danışıb. Artıq bu evlər üçün yerin ayrıldığını, bunun üçün 50 hektar ərazinin nəzərdə tutulduğunu bildirib. Hələ ki məkanı açıqlamayan qonaq bunun üçün yaradılmış agentliyə 10 milyon vəsaitin də ayrıldığını bildirib.