Dövlət Taxıl Fondu fermerlərə müraciət etdi
Fövqəladə Hallar Nazirliyinin (FHN) Dövlət Material Ehtiyatları Agentliyinin Dövlət Taxıl Fondu yüksək keyfiyyətli buğdanın tədarükü ilə bağlı fermerlərə müraciət edib.
Ölkə.Az "APA-Economics"-ə istinadən xəbər verir ki, FHN-in Dövlət Material Ehtiyatları Agentliyi Dövlət Taxıl Fondu üzrə İdarənin rəisi Zülfüqar Məmmədov keçirdiyi mətbuat konfransında deyib ki, ölkə üzrə 15 qəbul məntəqəsində, "Səngəçal Taxıl Elevatoru", "Gəncə Taxıl Elevatoru" və digər elevatorlarda buğda qəbulu həyata keçirilir: "Biz bu il qəbul məntəqələrində Kənd Təsərrüfatı Nazirliyi, İqtisadiyyat Nazirliyi və Standartlaşdırma, Metrologiya və Patent üzrə Dövlət Komitəsinin nümayəndələrinin iştirakını məqsədəmüvafiq hesab etmişik. Məntəqələr elə seçilib ki, ölkənin bütün regionu əhatə etsin və fermerlər məhsulu uzaq məsafəyə daşımadan təhvil verə bilsin".
Z. Məmmədov fermerlərdən yalnız yüksək keyfiyyətli buğda tədarük edildiyini bildirib: "Bəzən istehsalçılar yanlış olaraq taxıl biçilən kimi bu məhsulu gətirib təhvil verirlər. Yaxşı olar ki, fermerlər İqtisadiyyat Nazirliyi və Standartlaşdırma, Metrologiya və Patent üzrə Dövlət Komitəsində akkreditə olunmuş laboratoriyalara müraciət etsinlər və analiz nəticələri Nazirlər Kabinetinin qərarına uyğundursa, qəbul məntəqələrinə gətirib təhvil versinlər. Laboratoriyalarda məhsulun keyfiyyətinin yoxlanılması ödənişsizdir. Bəzən bizə təklif olunan buğdaların keyfiyyət göstəriciləri Nazirlər Kabinetinin təsdiq etdiyi keyfiyyət göstəricilərinə uyğun gəlmir. Çünki, bəzi hallarda fermerlər baha satmaq üçün məhsulu müəyyən müddət saxlamağa çalışır. İdeal saxlanma şəraiti olmadığına görə məhsullara xəstəlik düşür və məhsul yararsız vəziyyətə düşür".
Z. Məmmədov əlavə edib ki, iyun ayının 21-dən sentyabr ayının 1-ə kimi yerli buğda istehsalçılarından qiyməti 1 ton üçün 250 manat olmaqla Nazirlər Kabinetinin 7 iyul 2009-cu il tarixli 105 nömrəli qərarı ilə təsdiq edilmiş “Dövlət Taxıl Fondunun saxlanması və istifadəsi Qaydaları”nın 1 nömrəli əlavəsi ilə müəyyən edilmiş Dövlət Taxıl Fonduna buğda qəbul edəcək. "Fermerlərdən yüksək keyfiyyətli buğda həm qonşu ölkələrdən, həm də yerli bazardakı qiymətdən 20-30 manata baha alınır. Buda yerli fermerlərin taxıl istehsalına marağını artırmaq və yerli istehsalı stimullaşdırmaq məqsədi daşıyır", - deyə idarə rəisi qeyd edib.
Xatırladaq ki, FHN Dövlət Material Ehtiyatları Agentliyi Dövlət Taxıl Fondu üçün “Səngəçal Taxıl Elevatoru”, “Gəncə Taxıl Elevatoru”, “Abşeron Taxıl” MMC, “Dəvəçi-Dəyirman MMC”, “Karat-Holdinq”, “Karmen MMC”, “Gəncə-Dəyirman” MMC, “N.Quliyev adına Bakı-Taxıl” ASC, “Aveta” MMC, “Neon” firması, “EL” kiçik müəssisəsi, “Pak-Nur” Firması, “Xırman” Firması, “Rəşad” firması və “Svinks” MMC müəssisələri vasitəsilə cari ilin iyun ayının 21-dən sentyabr ayının 1-ə kimi yerli buğda istehsalçılarından qiyməti 1 ton üçün 250 manat olmaqla Nazirlər Kabinetinin 7 iyul 2009-cu il tarixli 105 nömrəli qərarı ilə təsdiq edilmiş “Dövlət Taxıl Fondunun saxlanması və istifadəsi Qaydaları”nın 1 nömrəli əlavəsi ilə müəyyən edilmiş Dövlət Taxıl Fonduna tədarük olunan taxıl üçün qəbul edilmiş aşağıdakı keyfiyyət göstəricilərinə cavab verən buğda qəbul edəcək.
Taxıl bazarının konyunkturuna müvafiq olaraq qiymət dəyişə bilər.
Müvafiq keyfiyyət göstəricilərinin tələblərinə cavab verməyən və məhsulun keyfiyyət göstəriciləri barədə akkreditə olunmuş laboratoriyadan sertifikatı olmayan buğda məhsulu qəbul edilməyəcək. Taxılın özüboşaldan yük maşınları ilə gətirilməsi tövsiyə edilir.
Əlaqə telefonları və qəbul məntəqələrinin ünvanları (9:00 -dan 18:00-a kimi) belədir:
- “Gəncə Taxıl Elevatoru”: Gəncə şəhəri, Azərbaycan əsgəri küçəsi-20, Tel: 050-660-39-03,
- “Səngəçal Taxıl Elevatoru”: Qaradağ rayonu, Səngəçal qəsəbəsi, Bakı-Səlyan şosesinin 51-ci kilometrliyi, Tel: 050-218-30-06,
- “Abşeron Taxıl” MMC: Abşeron rayonu, Xırdalan şəhəri, Samaxı şossesi, Tel: 012-342-90-04; 050-352-50-01,
- “Dəvəçi-Dəyirman MMC”: Şabran şəhəri, Nizami küçəsi-1, Tel: 050-314-39-21,
- “Karat-Holdinq”: Xirdalan şəhəri, Samaxı şossesi-23, Tel.: 050-222-38-36,
- “Karmen” MMC: Abşeron rayonu, Yeni Samaxı şossesi-23, Tel.: 050-223-18-93,
- “Gəncə-Dəirman” MMC: Gəncə şəhəri, Kimyaçılar küçəsi-1, Tel: 0-50-265-80-75,
- “N. Quliyev adına Bakı-Taxıl” ASC: Dərnəgül qəsəbəsi, 2096-cı məhəllə. Tel. 012-566-00-44; 050-214-72-81,
- “Aveta” MMC: Kürdəmir şəhəri, Bakı pospekti 6, Tel: 0-50-200-11-87,
- “Neon” firması: Gəncə şəhəri, Ə.Əliyev küç. 3, Tel: 0-50-220-30-27
- “EL” kiçik müəssisəsi: Sulutəpə qəsəbəsi, R.Allahverdiyev 300, 012-346-08-08, 055-271-73-73,
- “Pak-Nur” firması: Xaçmaz şəhəri, Tel: 050-590-18-36,
- “Xırman” firması: Biləcəri qəsəbəsi, Tel: 077-270-97-20,
- “Rəşad” firması: Bərdə şəhəri, Tel: 050-215-99-00,
- “Svinks” MMC: Xırdalan şəhəri, Tel: 050-630-65-92.
Əlavə məlumat almaq üçün FHN-in 012-512-50-25 və 070-271-71-33 nömrələrinə, habelə “112” qaynar xəttinə müraciət etmək olar.
Daxili malgöndərənlərdən tədarük edilən taxılın qəbulu üçün tələb edilən sənədlər bunlardır:
- Standartlaşdırma, Metrologiya və Patent üzrə Dövlət Komitəsi tərəfindən dənin keyfiyyət göstəricilərinə görə verilmiş uyğunluq sertifikatının surəti;
- Kənd Təsərrüfatı Nazirliyi tərəfindən verilmiş daxili karantin sertifikatı.
