Nazir: Dövlət hotel qiymətlərinə təsir edə bilməz
“Dövlət hotellərdə qiymətlərin formalaşmasına təsir edə bilməz”.
Ölkə.Az xəbər verir ki, bunu mədəniyyət və turizm naziri Əbülfəs Qarayev “Turizm və media: inkişafa aparan yolda birgə fəaliyyət” mövzusunda müsabiqənin qaliblərinin təqdim mərasimində deyib.
Nazir bildirib ki, dövlət hotellərdə qiymət siyasətini müəyyənləşdirmir və qiymətlər fərdi sahibkarlar tərəfindən müəyyən olunur:
“Dövlət olaraq biz sahibkarları maarifləndirə, onlara treninqlər keçə və qiymətlərin formalaşdırılmasında tövsiyələr verə bilərik”.
Ə.Qarayev əlavə edib ki, Azərbaycanda turizm bazarı inhisarçılığa məruz qalmır:
“Hər kəs bu sahə ilə məşğul ola bilər. Bu sahədə hər şey çox şəffafdır və ona görə də dövlətin bura müdaxilə etməsi yersizdir. Azərbaycanda turizmin inkişafı prioritet istiqamətlərdən biridir. Həm daxili turizm, həm də xarici turizm inkişaf etdirilməlidir. Daxili turizm ona görə inkişaf etməlidir ki, Azərbaycan vətəndaşları kənara getməsin, ölkədən kənara valyuta axını olmasın”.
