\"Azərbaycanda bankların sayının azalması prosesi davam edəcək\"

Azərbaycanda 4 bank bağlandı.

Maliyyə Bazarlarına Nəzarət Palatasının (Palata) Direktorlar Şurasının 21 iyul 2016-cı il tarixli qərarına əsasən “Dekabank” ASC, “Kredobank” ASC, “Parabank” ASC və “Zaminbank” ASC-nin bank lisenziyaları ləğv edilib.

Bundan əlavə bir neçə bankın da əmanətləri qaytara bilmədiyi barədə məlumatlar var. Ölkədə daha bir neçə bankın bağlanacağı gözlənilir.

Bankların bağlanması və bank sektoru barədə iqtisadçı ekspert Vüqar Bayramov Ölkə.Az-a danışıb:

"Bankların bağlanması gözlənilən idi. Sizin sayta müsahibəmdə də, ötən ilin axırları, bu ilin ortalarında bir neçə bankın bağlanacağını bildirmişdim. Bankların bir qisminin neftin dünya bazarında qiymətinin yüksək olduğu dövrdə də problemləri var idi. Neftin dünya bazarında qiymətinin aşağı düşməsindən sonra həmin bankların problemləri daha da artdı. Nəticədə bu banklar müflis oldu.

Bankların bir qismi hesabatlarını mütəmadi yerləşdirmirdilər, məlumat vermirdilər. 4 bankın bağlanması o anlama gəlmir ki, onlar sonunculardır. Güman olunur ki, digər zəif bankların lisenziyasının alınması prosesi baş verəcək. Növbəti 2 ildə Azərbaycanda bankların sayının azalması prosesi müşahidə olunacaq.

Hətta neftin dünya bazarında qiymətinin yüksək olduğu dövrdə də Azərbaycanda bankların sayının çox olduğunu bildirmişdik. Qonşu Qazaxıstan və MDB-nin digər neft ölkələri ilə müqayisə etsək hər min nəfərə düşən bankların sayı Azərbaycanda çox idi. Bankların sayının azalması əslində gözlənilən idi. Bankların yüksək gəlir əldə etməsi bank sektoruna marağı artırmışdı. Heç də güclü olmayan banklar bazara daxil ola bilmişdilər.

İndiki məqamda Maliyyə bazarına nəzarət palatası, istər də Əmanətlərin Sığortalanaması Fondu əmanətlərin qaytarılması ilə bağlı çox diqqətli olmalıdırlar. Sığortalanan əmanətlərin hamısının qaytarılmasına ehtiyac var. Sığortalanan əmanətlər tam olaraq vətəndaşlara qaytarılmalıdır. Bununla bağlı əmanətlərin sığortalanması fondu öhdəlik götürüb. Bank sektoruna inamın azalmaması üçün əmanətlərin qaytarılmasına ehtiyac var. Kredit müqavilələrinin dəyişdirilməməsinə, onların olduğu kimi davam etməsini təmin etmək lazımdır.

Bankların problemli kreditləri artdığı üçün həm Mərkəzi Bankın və həm də Maliyyə Bazarına Nəzarət Palatasının bank sektoru ilə bağlı daha real addımlar atmasına ehtiyac var. Bankların indiki məqamdə dəstəyə ehtiyacı var. Əslində zəif bankların bazarda qalmasındansa ya müflis olması, ya da birləşməsi daha yaxşı olardı. Bu gün əmanəti geri qaytara bilməyən bank var. Həmin bank da müflis edilməlidir.

4 bankın bağlanması gözlənilən idi. Növbəti illərdə Azərbaycanda mərhələli şəkildə bankların sayının azalacağı gözlənilir".

Səxavət Məmməd
Ölkə.Az