Elektron apelyasiya şikayətləri “Elektron hökumət” portalına həvalə olundu
Azərbaycan Prezidenti İlham Əliyevin 2016-cı il 3 fevral tarixli fərmanı ilə yaradılan Apelyasiya Şurası üzrə xidmətlər Rabitə və Yüksək Texnologiyalar Nazirliyi (RİTN) Məlumat Hesablama Mərkəzi tərəfindən elektronlaşdırılıb.
“APA-Economics”in məlumatına görə, artıq “Apelyasiya Şuralarına elektron şikayət qəbulu” xidməti “Elektron hökumət” portalına inteqrasiya olunub.
Bu gün “Elektron hökumət” portalının operatoru – RİTN yeni elektron xidməti ictimaiyyətə təqdim edib.
Nazirliyin mütəxəssisləri tərəfindən Elektron Hökumət Təlim Tədris Mərkəzində keçirilən tədbirdə mərkəzi və yerli icra hakimiyyəti orqanlarının mütəxəssis nümayəndələrinə elektron xidmətlə bağlı təlim də keçirilib.
“Apelyasiya Şuralarına elektron şikayət qəbulu” xidməti sahibkarlıq fəaliyyəti göstərən hüquqi və fiziki şəxslərinə müraciətlərinin elektron şəkildə Azərbaycanın mərkəzi və icra hakimiyyəti orqanlarına operativ çatdırmasına xidmət edir.
Sahibkarlar üçün çox böyük əhəmiyyət daşıyan xidmət, eyni zamanda şikayətçilərin dövlət orqanlarına müraciətlərinin daha da asanlaşmasına, sənədlərin elektron şəkildə təqdim edilməsinə, müraciətlərə baxılma barədə məlumatların əldə edilməsinə imkan verəcək. Bu xidmətdən istifadə edən vətəndaş, həmçinin göndərdiyi müraciətə baxılma barədə məlumatı izləmək və verilən qərarı elektron formada əldə edə bilmək imkanı qazanacaq.
Qeyd edək ki, tam elektronlaşdırılmış bu sistemə Prezident yanında Apelyasiya Şurası da daxil olmaqla 118 qurum qoşulacaq.
