Mərkəzi Bank dollarlaşma səviyyəsini azaldır

“Manatla depozitlərin müddət strukturunda cari ilin birinci yarısında dəyişiklik baş verib. Manatla müddətli depozitlər dövr ərzində 0,4%, tələb olunanadək depozitlər isə 10,6% artıb”.

Ölkə.Az xəbər verir ki, bu barədə Azərbaycan Mərkəzi Bankının (AMB) pul siyasəti icmalında bildirilir.

“Hesabat dövrü ərzində geniş pul kütləsi (M3) 2% azalaraq 20851,5 milyon manat olub. M3 pul aqreqatının M2 pul aqreqatından fərqli olaraq azalma nümayiş etdirməsi xarici valyutada əmanət və depozitlərin azalması ilə əlaqədardır.

Belə ki, 2016-cı ilin birinci yarısında xarici valyutada əmanət və depozitlərin M3 pul aqreqatında xüsusi çəkisi ilin əvvəlində 59,2% olduğu halda, I yarımilin yekunu üzrə 53% təşkil edib.

Xarici valyutada depozitlərin cəmi əmanət və depozitlərdə xüsusi çəkisi isə ilin əvvəlində 76,4% təşkil etdiyi halda I yarımilin sonuna 72,8% təşkil edib. I yarımildə fiziki şəxslərin manatla əmanətləri ilin əvvəlinə nəzərən 6,8% artdığı halda xarici valyutada əmanətləri 21,8% azalıb.

Fiziki şəxslərin depozitlərinin dollarlaşması səviyyəsi ilin əvvəlindəki 85%-dən 80,6%-ə enib”.