Lisenziyası ləğv edilmiş bankın apellyasiya şikayətini qəbul etmədilər
Bakı Apellyasiya Məhkəməsində lisenziyası ləğv edilmiş “Parabank” ASC-nin əmanətçisi-mülkiyyətçisi tərəfindən Azərbaycan Maliyyə Bazarlarına Nəzarət Palatasının (MBNP) ərizəsi əsasında məhkəmə qərarından verilən apellyasiya şikayətinə baxılıb.
Ölkə.Az “Report”a istinadən xəbər verir ki, hakim Sərvət Hüseynovun sədrliyi ilə keçirilən prosesdə qərar elan olunub.
Qərara əsasən, “Parabank” ASC-nin apellyasiya şikayəti qeyri-mümkün hesab edilib.
Qeyd edək ki, Maliyyə Bazarlarına Nəzarət Palatasının (Palata) Direktorlar Şurasının 21 iyul 2016-cı il tarixli qərarına əsasən, “Parabank” ASC-nin bank lisenziyası ləğv edilib.
22 iyul 2016-cı il tarixdən lisenziyası ləğv olunmuş bankın MBNP tərəfindən müvəqqəti inzibatçı təyin edilib.
Palata “Parabank” ASC-nin məcburi ləğvi və Əmanətlərin Sığortalanması Fondunun 24.07.2016-cı il tarixdən etibarən bankın ləğvedicisi təyin edilməsi barədə 1 saylı Bakı İnzibati-İqtisadi Məhkəməsinə müraciət edib. Məhkəmə ərizəni təmin edib. Həmin qərardan narazı qalan “Parabank” ASC-nin əmanətçisi-mülkiyyətçisi Həbib-Zadə Vəfa Həbib oğlu apellyasiya şikayəti verib.
