\"Artıq əminliklə demək olar ki, Cənub Qaz Dəhlizi layihəsi reallaşmaq üzrədir\"

Yeni Azərbaycan Partiyasının (YAP) Siyasi Şurasının, Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Aydın Hüseynov ölkəmizdə səfərdə olan Xorvatiya prezidenti Kolinda Qrabar-Kitaroviçin Prezident İlham Əliyevlə keçirdiyi görüşlərin və enerji sahəsində aparılan müzakirələrin əhəmiyyətini şərh edib.

YAP-çı deputat Ölkə.Az-a açıqlamasında bildirib ki, Avropanın enerji təminatında Azərbaycanın xüsusi çəkisi və strateji əhəmiyyəti daha da artıb. Onun sözlərinə görə, Azərbaycan ilə Avropa ölkələri arasında enerji sahəsində strateji tərəfdaşlıq və əməkdaşlıq mövcuddur:

“Cənab Prezident İlham Əliyev də xorvatiyalı həmkarı ilə keçirilən görüşdə çox doğru vurğuladı ki, bu gün Azərbaycanla Avropa ölkələri arasında bir sıra qlobal əhəmiyyətli enerji layihələri həyata keçirilir. Belə layihələrdən biri də “Cənub Qaz Dəhlizi” layihəsidir. Bilirsiz ki, Xorvatiya da Cənub Qaz Dəhlizi Məşvərət Şurasının toplantısında iştirak edib və Azərbaycanla əməkdaşlıq münasibətləri yeni müstəviyə keçib. Eyni zamanda, Xorvatiya da bu layihəyə qoşulmaq istəyir. Yəqin ki, yaxın illərdə Xorvatiya və digər Avropa ölkələri də öz enerji təhlükəsizliklərini təmin etmək üçün “Cənub Qaz Dəhlizi” layihəsinə qoşulacaqlar”.
Deputat “Cənub Qaz Dəhlizi”-nin qlobal enerji təhlükəsizliyi layihəsi olduğunu diqqətə çatdırıb:

“Hazırda 7 ölkə bu layihəyə qoşulub. Azərbaycan isə bu layihədə lider dövlət olaraq mühüm rol oynayır. Artıq əminliklə demək olar ki, “Cənub Qaz Dəhlizi” layihəsi reallaşmaq üzrədir”.

A.Hüseynov əlavə edib ki, Avropa İttifaqı ilə Azərbaycan arasında enerji sahəsində strateji tərəfdaşlıq memorandumu da mövcuddur.

Zaur Əziz
Ölkə.Az