AMB: Bank depozitlərinin dollarlaşması səviyyəsi aşağı düşüb
2016-sı ilin 9 ayı ərzində manatla pul kütləsinin dinamikası inflyasiyanın azaldılmasına yönəldilmiş makroiqtisadi siyasət tədbirləri və dollarlaşmanın ötən ilə nəzərən səngiməsi fonunda formalaşıb.
“APA-Economics” xəbər verir ki, bu barədə məlumat Mərkəzi Bankın 2016-cı ilin yanvar-sentyabr ayları üzrə Pul Siyasəti icmalında yer alıb.
Sənəddə qeyd olunub ki, hesabat dövründə manatla pul bazası 1,3% azalaraq 9 ayın sonuna 6810,3 mln. manat təşkil edib. Dövr ərzində pul bazasının artımının komponentləri olan dövriyyədə olan nağd pul kütləsi (bank sistemindən kənar nağd pul və bankların kassalarındakı nağd pul) 14,3% artıb, manatla müxbir hesablar isə 59% azalıb.
Hesabat dövründə bank sisteminin pul yaratma qabiliyyətini ifadə edən pul multiplikatoru 16,4% artaraq 1,46 səviyyəsinə yüksəlib. Bununla əlaqədar olaraq, manatla pul kütləsinin artımı pul bazasının artımını üstələyib. 9 ay ərzində manatla geniş pul kütləsi (M2) 14,8% artaraq dövrün sonuna 9966,4 mln. manat təşkil edib.
“Manatla pul kütləsinin (M2) strukturunda nağd pul kütləsi, fiziki şəxslərin əmanətləri və hüquqi şəxslərin depozitləri fərqli dinamika nümayiş etdirib. Belə ki, dövr ərzində nağd pul kütləsi 19%, fiziki şəxslərin manat əmanətləri 0,4%, hüquqi şəxslərin manat depozitləri isə 19,8% artıb. Manatla depozitlərin müddət strukturunda da dövr ərzində dəyişiklik baş verib. Manatla müddətli depozitlər dövr ərzində 9% azalıb, tələb olunanadək depozitlər isə 25,6% artıb. Hesabat dövrü ərzində geniş pul kütləsi (M3) 5,4% azalaraq 20134,2 mln. manat olub. M3 pul aqreqatının M2 pul aqreqatından fərqli olaraq azalma nümayiş etdirməsi xarici valyutada əmanət və depozitlərin azalması ilə əlaqədardır. 2016-cı ilin ötən dövründə bank depozitlərinin dollarlaşma səviyyəsi aşağı düşüb. Nəticədə, xarici valyutada əmanət və depozitlərin M3 pul aqreqatında xüsusi çəkisi ilin əvvəlində 59,2% olduğu halda, 9 ayın yekunu üzrə 50,5% təşkil edib. Xarici valyutada depozitlərin cəmi əmanət və depozitlərdə xüsusi çəkisi isə ilin əvvəlində 76,4% təşkil etdiyi halda 9 ayın sonuna 70,4% təşkil edib. 9 ayda fiziki şəxslərin manatla əmanətləri 0,4% artdığı halda xarici valyutada əmanətləri 20,7% azalıb. Nəticədə, fiziki şəxslərin depozitlərinin dollarlaşması səviyyəsi ilin əvvəlindəki 85%-dən 81,7%-ə enib”, - deyə icmalda vurğulanıb.
