"Biz neftin baha qiymətini bir daha görməyəcəyik"
OPEC-in baş katibi Məhəmməd Barkindo bəyan edib ki, uzun müddətli ucuz neft qiymətləri dövrü başa çatma mərhələsindədir.
Barkindo Venesuela prezidenti ilə görüşün nəticələrinə əsasən bildirib ki, bu dövr davam edir. Çox güman ki, artıq biz ucuz neft qiymətləri dövrünün final mərhələsindəyik.
Bu arada ABŞ daxili işlər nazirliyinin tərkibində olan Geoloji kəşfiyyat qurumu ölkənin Texas əyalətinin qərbində, Permian Hövzəsindəki Volfkamp adlə sahədə böyük neft yatağı aşkar edib. Ekspertlər bilidrir ki, əgər ABŞ istehsala başlasa dünya bazarında neftin qiyməti daha da ucuzlaşacaq.
OPEC-in baş katibi Məhəmməd Barkindonun neftin qiyməti ilə bağlı səsləndirdiyi bəyanatına iqtisadçı ekspert İlham Şaban Ölkə.Az-da münasibət bildirib:
"OPEC-in baş katibi Məhəmməd Barkindo dediyi sözün iqtisadi əsasını açıqlamayıbsa, deməli o boş-boş sözlərdir. Hal-hazırda məsələ bundadır ki, dünya bazarında tələb təklifi 2 milyon barel üstələyir. 2 milyon barel neft dünya bazarından yığışdırılmasa neft necə bahalaşa bilər?
Ona görə də, belə bəyanatların verilməsi xoş arzulardan başqa bir şey deyil. Hətta OPEC Vyana görüşündə yekun 700 min barel kvotanın azaldılması barədə qərar qəbul eləsə, bu bazar üçün qısa müddətli bir siqnal olacaq. Bu isə bazarda qiymət artımına uzun müddətli təsir etməyəcək. Qısa müddətli təsir maksimum 3 ay ola bilər. Biz neftin baha qiymətini bir daha görməyəcəyik".
Səxavət Məmməd
Ölkə.Az
