AİB sədri: "Mən əminliklə deyirəm ki, bağlanan bütün müəssisələrin hamısı işləyir"
Bu ilin sentyabr ayı ərzində Azərbaycanın sanitariya-epidemioloji xidmət orqanları tərəfindən yeyinti məhsullarının istehsalı, satışı, saxlanması və daşınması zamanı sanitariya norma və qaydalarının tələblərini pozan, o cümlədən laboratoriya müayinələrinin nəticələrinə görə, gigiyenik normalara cavab verməyən məhsullar istehsal edən 31 müəssisənin sahibi inzibati qaydada cərimələnib.
Heç kimə sirr deyil ki, yeyinti məhsullarının istehsalı, saxlanması və daşınması zamanı kifayət qədər antisanitar faktlar qeydə alınır.
Məsələ ilə əlaqədar Azad İstehlakçılar Birliyinin sədri Eyyub Hüseynovla əlaqə saxladıq. Ölkə.az-a danışan AİB sədri bildirdi ki, qida sektorunda antisanitariyanın həcmi çox böyükdür.
"Mən tam əminliklə deyirəm ki, bağlanan bütün müəssisələrin hamısı işləyir. Sənəddə guya bağlanıb. Dövlətin istehlakçı hüquqlarını qoruyan qanunlar kompleksi o qədər zəifdi ki, dövlətin əhəmiyyətli orqanları o arzuları elə arzu olaraq qalır.
Mən Kanada da olanda internetdə oxudum ki, böyük bir restoranda tarakan görünüb. Sabah tezdən bu işin həvəskarı kimi həmin restorana gələndə gördüm ki, artıq həmin müəssisənin qapısından qfıl asılıbdır. Azərbaycanda isə tərsinədir, onlar bağlanmaq haqqında qərarlar verirlər, ancaq heç kim müəssisəni bağlamır və fəaliyyətə davam edir.
Bu gün antisanitar vəziyyətə görə bağlanan 34 müəssisə dəryada bir damladır. Bakıdan tutmuş Gəncəyə qədər irili, xırdalı bu tip müəssisələrə nəzər salsaq, ondan da çox antisanitar vəziyyətə rast gələrik. Əslində bu müəssisələrin hər biri bağlanmalıdır. Çox təəssüf ki, ölkədə güclü antisanitariya var.
Ötən il yay aylarında mən fərdi olaraq böyük monitorinq apardım. Hacıkənd istimaqətinə getsək orada N sayda antisanitar vəziyyətlə rastlaşarıq. Orada bir çay axır və o çayda uşaq əskisi də yuyulur, qab da yuyulur. Fəaliyyət göstərən restoranlarda da olduqca antisanitar vəziyyət var. Üzdən olduqca səliqəli görünən bu yeməkxanaların mətbəxində kirli qadınlar, kirli qablardan istifadə edə-edə, milçəklərin müşaiyyəti ilə yemək bişirilir. Qida sektorunda antisanitariyanın həcmi çox böyükdür".
-Kiçik müəssisələr, mısal üçün dönər, qutab bişirilən müəssisələr var ki, nəzarətdən kənar qalıb. Bəs burada vəziyyət necədir?
"Biz ictimai təşkilat olaraq yalnız maariflənmə işləri aparırıq, tapşırıqlar veririk. Vəziyyəti düzəltmək üçün öz şifahi iradlarımızı bildiririk.
Ölkədə fəaliyyət göstərən 15 minə qədər dönərxana var. Biz monitorinqlər apardıq təxminən 85% müəssisə standartlara uyğun şəkildə fəaliyyət göstərirdi. 2006-cı ildə "Quş qripi" ilə bağlı Səhiyyə Nazirliyi" toyuq ətlərindən dönər hazırlanmasına saxta qadağa qoydu, ancaq buna baxmayaraq 80%-yerlərdə yenə də toyuq ətindən dönərlər hazırlanır. Oktay Şirəliyevə saxta qadağanın aradan götürülməsi ilə bağlı müraciət də etmişdik. Cavab gəldi ki, hələ baxılır, amma aradan götürülməyib.
Hazırda bütün ölkədə ciddi anti-sanitariya var ki, bunun da bütün səbəbləri qanunlarda olan boşluqdur. Sanitariya orqanlarının əl-qolu qanunlarla bağlanılıbdır. Dövlətin biznes inkişafı siyasəti istehlakçı hüquqlarını çox-çox qabaqlayıb. Mən qorxuram ki, bu hal ciddi epidemiyalara səbəb olsun".
Qeyd edək ki, bu il antisanitariyaya görə 34 müəssisənin sahibi cərimələnib, 215 obyektin istismarı dayandırılıb, 145 iş istintaq orqanına verilib, 208 nəfər isə işdən kənarlaşdırılıb.
Fatimə İbrahimova
Ölkə.az
