"OPEC-in nikbinliyə əsası yoxdur"

Neftin dünya bazarında qiymətinin artacağı ilə bağlı nikbin proqnozlar verilir.

Bir müddət əvvəl OPEC-in baş katibi Məhəmməd Barkindo bəyan etdi ki, uzun müddətli ucuz neft qiymətləri dövrü başa çatma mərhələsindədir.

Azərbaycanın energetika naziri Natiq Əliyev deyib ki, proqnozlara əsasən, 2020-ci ilin ortalarında neftin barelinin 100 dollar olduğu dövrə qayıtmaq mümkün olacaq. Natiq Əliyev bunu əhalinin saynın artması ilə əsaslandırıb.

Bir çox ekspertlər isə neftin dünya bazarındakı qiyməti ilə bağlı bədbin proqnoz verirlər.

Neftin dünya bazarındakı proqnozlaşdırılan qiyməti ilə bağlı iqtisadçı ekspert Qubad İbadoğlu Ölkə.Az-a danışıb:

"Bunlar hamısı gözləntilərdir. OPEC-in də yanaşması odur ki, hasilatın aşağı salınması ilə bağlı razılaşma olarsa, bu, qiymətlərə təsir göstərəcək. Bu formulun baş tutub tutmayacağı ilə bağlı yekun sözü indidən demək çox çətindir.

İndiki şərtlərlə OPEC üzvü dövlətlərin istəyi ondan ibarətdir ki, neftin qiyməti baha olsun. Bəyanatlardan görünən odur ki, burada iqtisadi yox, siyasi mənfəətlər də güdülür. Ona görə də, düşünürəm ki, OPEC-in nikbinliyə əsası yoxdur. OPEC-in qərar verəcəyinə qədər başqa proseslər də baş verə bilər.

Heç kimin ağlına gəlmirdi ki, ABŞ tarixində ən böyük neft yatağını aşkar etsin. Bu sabah başqa bir ölkədə də baş verə bilər, ərəb ölkələrində, İranda böyük neft yataqları aşkarlana bilər. Düşünürəm ki, qiymətlə bağlı nikbin proqnozları bölüşmək çox tezdir. Gözləmək lazımdır. Gözləntilərim ondan ibarətdir ki, yaxın zamanlarda neftin dünya bazarındakı qiymətlərində ciddi dəyişikliklər baş verməyəcək".

Səxavət Məmməd
Ölkə.Az