Elman Rüstəmov: “Neftin qiyməti 30-40 dollar artsa, daha yaxşı olar”

“Maliyyə itkilərini qarşılamaq üçün Azərbaycan hökumətinin kifayət qədər ehtiyatları və maliyyə resursları var. Bunun nəticəsində də Azərbaycan bütövlükdə öz siyasətini formalaşdıra bilir”.

Ölkə.Az-ın məlumatına görə, bunu Azərbaycanın Mərkəzi Bankının sədri Elman Rüstəmov bu gün Milli Məclisdə 2017-ci il üzrə Azərbaycanın dövlət büdcəsi layihəsinin müzakirəsi zamanı bildirib.

E.Rüstəmov qeyd edib ki, neft gəlirlərinin artması Azərbaycan üçün çox əhəmiyyətlidir.

“Neftin qiyməti 30-40 dollar artsa, daha yaxşı olar. Neftin qiyməti Azərbaycan iqtisadiyyatı üçün çox ciddi amildir. Ancaq dünyada yeni çağırışlar var. Biz də bunu nəzərə almalıyıq”.

Mərkəzi Bankın sədri həmçinin qeyd edib ki, Maliyyə Sabitliyi Şurasında Azərbaycanın yeni iqtisadi modeli haqqında müvafiq sənəd hazırlanır:

“Hələlik bunun detalları tam açıqlanmır. Hazırda Maliyyə Sabitliyi Şurasından ciddi iş və müzakirələr gedir. Bütövlükdə makroiqtisadi sabitlik iqtisadi və sosial sabitliləşdirmə, yeni iqtisadi modelə keçməklə bağlı yeni sənəd üzərində işləyirik. Susmağımızın səbəbi budur. Bu sənəd razılaşdırılmayana qədər hələ ki, susmağa üstünlük veririk. Ancaq bütövlükdə Zahid Oruc və digər deputatların iradlarını qəbul edirik”.

E.Rüstəmov vurğulayıb ki, gələn il Azərbaycanda iqtisadi vəziyyət indikindən mürəkkəb ola bilər:

“Uzun illər hakimiyyətdə olan biri kimi demək istəyirəm ki, 2017-ci ilin büdcə və vergi siyasətinə baxdıqda həqiqətən də vəziyyətin gələn ilin mürəkkəb olacağını deyə bilərik. Amma bu o demək deyil ki, vəziyyət çox pisdir. Azərbaycan 90-cı illərdə bundan da pis vəziyyətləri yaşayıb.

Deputat Zahid Orucun tutduğu irad və etdiyi tənqid yerindədir. Bu gün formalaşmış büdcəyə böyük əmək qoyulub. Maliyyə Nazirliyinin böyük zəhməti var. Zahid Orucla razılaşıram ki, bizim kommunikasiya siyasəti effektli deyil”.

Zaur Əziz
Ölkə.Az