“İpək Yolu” Kanadaya uzanır

Noyabr ayının 2-3 tarixlərində Kanadada Türk dövlətləri və Kanada İqtisadi Konqresi keçirilib. Konqresin keçirilməsində məqsəd Türk dövlətləri və Kanada arasında iqtisadi əməkdaşlıq, tərəfdaşlıqların genişləndirilməsi və bu istiqamətdə görülə biləcək işlərin müzakirəsi olub. Azərbaycanı tədbirdə “İpək Yolu” Sahibkarlığın İnkişafına Dəstək İctimai Birliyi təmsil edib. Məlumat üçün qeyd edək ki, “İpək Yolu” artıq ikinci dəfədir bu tip tədbirdə həm sponsor, həm də iştirakçı qismində yer alıb. Birliyin İdarə Heyətinin sədri Rəşid Çulaqov qəzetimizə müsahibəsində bizə sözügedən tədbir barəsində ətraflı məlumat verdi. R. Çulaqov qeyd etdi ki, “Anatolian Heritage Federation”nın təşkilatçılığı ilə həyata keçirilən konqresdə Kanada parlamentindən 21 millət vəkili, ölkənin daxili işlər və miqrasiya naziri, sabiq dövlət xadimləri, professorlar, eləcə də türk dövlətlərindən nümayəndələr iştirak ediblər.

Ölkə.Az bildirir ki, birliyin sədrinin sözlərinə görə, konqres 3 paneldən ibarət olub: “Hər 3 panelin moderatorları Kanada hökumətinin təmsilçiləri idi. I panelə millət vəkili, Təbii resurslar komitəsi sədri Leon Benoit, II panelə Xarici əlaqələr və beynəlxalq ticarət komitəsinin sədr müavini, senator Persi Doune, III panelə isə Pol Deuar rəhbərlik edib. Panellərin mövzuları “Kanada və Türk dövlətləri arasında ticarət dövriyyəsinin diversifikasiyası”, “Kanada, Türk dövlətləri və Qafqaz: strateji tərəfdaşlıq və əməkdaşlıq” və “İpək Yolu dəhlizi istiqamətində yeni təşəbbüslər” idi. Panellərdə Azərbaycandan ölkəmizinin Kanadakı müvəqqəti işlər vəkili Ramil Hüseynli, “İpək Yolu” İctimai Birliyinin İdarə Heyətinin üzvü dr. Elnur Əsgərli və Qafqaz Universitetinin professoru Sərvər Qurbanov məruzə ilə çıxış etdilər”.

R. Çulaqov konqresdə Azərbaycan və Kanada arasındakı ticarət dövriyyəsinin gündəmə gəldiyini bildirdi. Sədrin sözlərinə görə, o, kanadalı iş adamları ilə söhbəti zamanı iki ölkə arasındakı ticarət dövriyyəsinin artırılması üçün Kanadanın Azərbaycanda səfirliyinin açılmasının vacibliyini dilə gətirib: “Ötən ilin ticarət dövriyyəsinə baxanda Kanadadan Azərbaycana idxal olunan məhsul 30 milyon dollar, Azərbaycandan Kanadaya ixrac olunan məhsul isə 480 milyon dollara yaxındır. Kanada və Qazaxıstan arasındakı ticarət dövriyyəsi isə 2 milyarda bərabərdir. Kanadanın Qazaxıstanda səfirliyi olsa da Azərbaycanda səfirliyi mövcud deyil. Kanadaya səfər etmək üçün bir vizanın alınması üçün 25-40 arası gün vaxt sərf olunur. Bir iş adamı üçün günlər yox dəqiqələr, saatlar əhəmiyyətlidir. Mənə elə gəlir ki, Azərbaycanda Kanada səfirliyi açılsa bu iqtisadi göstəricilər dəfələrlə arta bilər. Konqresdə Kanadanın Avrasiya və Qafqazlar Dərnəyinin rəhbəri Sebastian Dakinlə bu barədə danışdıq. Mən ona dedim ki, bir iş adamı olaraq əgər Kanadaya viza almaq üçün 40 gün tələb olunursa bu ölkəyə getmək mənim üçün maraqlı deyil. Ona Azərbaycanda Kanada səfirliyinin açılmasının vacibliyini vurğuladım. S. Dakin də tədbirdə söz alaraq iki ölkə arasındakı ticarət dövriyyəsindən bəhs etdi və Azərbaycanda niyə səfirliyin açılmamasını gündəmə gətirdi. Kanadalı millət vəkilləri də bu təklifə müsbət baxdılar”.

R. Çulaqovun sözlərinə görə, Koqresdə Kanadanın daxili işlər və miqrassiya naziri, millət vəkili Kris Aleksandr da viza məsələsinə münasibət bildirib: “Nazir bildirdi ki, Kanada hökuməti 2015-ci ildə 250 min mühacir qəbul edəcək. O həmçinin viza məsələsinin belə uzun müddətə verilməsi məsələsi ilə bağlı rəhbərlik etdiyi nazirliyin maraqlanacağını qeyd etdi”.

Sonda “İpək Yolu” İctimai Birliyinin rəhbəri sözügedən tədbirin azərbaycanlı iş adamları üçün yeni imkanlar açacağına inandığını söylədi: “Biz Konqresdə iştirak edən təşkilatlarla gələcək layihələrdə əməkdaşlıq və tərəfdaşlıq etmək qərarına gəldik. İnanıram ki, bu tip tədbirlər iki ölkə arasındakı iqtisadi əməkdaşlığı daha da gücləndirəcək”.

Ölkə.Az