Bu yay ucuzluq olacaq

Rəsmi statiktikaya görə, bu ilin son 4 ayında ərzaqların qiymətində artım qeydə alınıb. Hətta yerli ərzaq məhsullarında qiymət artımı müşahidə edilir. Bu səbəbdən, hər kəsi bir sual maraqlandırır - bu yay qiymət artımı davam edəcəkmi?

Suala cavab tampaq üçün ekspertlərə üz tutduq. Məsələ ilə əlaqədar iqtisadçı ekspert Vüqar Bayramov “Ölkə.Az”a açıqlamasında bildirib ki, yayda mövsümlə bağlı bəzi meyvə və tərəvəz məhsullarının qiymətində ucuzlaşmalar olacaq.

“Yayda daha çox məhsulların bazarlara çıxarılması müşahidə edilir. Bu da ucuzlaşmaya gətirib çıxarır. Ərzaq və qeyri-ərzaq məhsullarında qiymət azalmaları müşahidə edilmir. Əksinə, güman edilir ki, yay aylarından sonra qiymət artımı olsun. Burada manatın dollara nisbətən məzənnəsi çox önəmlidir. İdxal olan məhsulların hansı kursla alınması, birbaşa onların xərclərini müəyyənləşdirir”, - deyə V. Bayramov bildirib.

Ekspert deyir ki, manatın son 4 ayda möhkəmlənməsinə baxmayaraq, hələlik bunun istehlak bazarına təsir etməsini hiss etmirik. V.Bayramovun fikrincə, valyuta bazarına nisbətən qiymətlər yenə də yüksək olaraq qalmaqdadır:

“Sahibkar qiyməti aşağı salmaqda maraqlı deyil. Bununla mübarizə aparmaq üçün birinci növbədə rəqabəti gücləndirməliyik. Xüsusən alternativ satış yerlərini təşkil etmək lazımdır”.

Məsələ ilə bağlı Milli Məclisin İqtisadi Siyasət, Sənaye və Sahibkarlıq komitəsinin üzvü Vahid Əhmədov “Ölkə.Az”a açıqlamasında bildirib ki, yay aylarında meyvə-tərəvəz ucuzlaşacaq.

“Hazırda bazarlarda kifayət qədər meyvə-tərəvəz var. Düzdür bir qədər yağışlar, külək və dolu oldu. Bu da təsərrüfata bir qədər ziyan vursa da, yenə də bazarlarda bolluq müşahidə olunur. Hesab edirəm ki, qiymətlərdə ciddi artımlar olmayacaq”.

Ziya Səccad
Ölkə.Az