Banklardan nağdsız hesablaşmalarla bağlı təkliflər istənildi
"Ölkə.Az" “Marja”ya istinadən xəbər verir ki, məktubda “Nağdsız hesablaşmalar haqqında” qanun layihəsinə dəyişikliklər edilməsi məqsədilə banklardan təkliflərin göndərilməsi istənilir. Digər bir məlumata görə, qanuna dair təkliflər 12 iyunda Milli Məclisdə müzakirə olunacaq.
Məktubda deyilir:
Məlumat üçün nəzərinizə çatdırırıq ki, “Nağdsız hesablaşmalar haqqında” Qanunun (Qanun) və Maliyyə Bazarlarına Nəzarət Palatasının (Palata) aidiyyəti tələblərinin icrası ilə bağlı Azərbaycan Banklar Assosiasiyasının (ABA) nəzdində fəaliyyət göstərən “Çirkli pulların yuyulmasına qarşı mübarizə və komplayns üzrə Ekspert Qrupu”nun nümayəndələrindən, Palata və Maliyyə Monitorinq Xidmətinin (MMX) əməkdaşlarından ibarət müvəqqəti İşçi Qrup yaradılıb.
Həyata keçirilmiş intensiv fəaliyyət nəticəsində, İşçi Qrup tərəfindən vergi ödəyicilərinin hesablarından fiziki şəxslərə köçürmələr, dövlət şirkətlərindən və dövlət müəssisələrindən vergi ödəyicilərinin hesablarına daxilolmaların istifadəsi, habelə Qanunun 3.5-ci maddəsinin tətbiqi üçün nəzarət prosesi üzrə tövsiyyələr hazırlanıb. Sözügedən sənədin hazırlanmasında ABA üzvü olan banklar, Palatanın və MMX-nın nümayəndələri yaxından iştirak edib və sənəddə Qanunun ümumi mahiyyəti, bank praktikasından yaranan məqamlar, habelə vergi ödəyicilərinin mövqeləri nəzərə alınıb. ABA-nın məqsədi, sənəddə qeyd edilən nəzarət prosesinin tətbiqi nəticəsində Qanunun icrası ilə bağlı meydana çıxan məsələlərin aydınlaşdırılmasına şəraitin yaradılması və bunun vergi ödəyicilərinin mövzu üzrə şikayətlərinin azalması ilə nəticələnməsidir”.
Hazırda “Nağdsız hesablaşmalar haqqında Azərbaycan Respublikasının Qanunu”na əlavə və dəyişikliklər layihəsinin müvafiq orqanlarda müzakirəsi aparılır.
