Koronavirus varlıların daha varlı olmasına şərait yaradıb

Koronavirus pandemiyası dövründə bütün dünya milyarderləri sərvətlərini artırıblar. 

“Ölkə.Az” “Bloomberg”ə istinadən xəbər verir ki, bu barədə bir qrup iqtisadçı ekspertin hazırladığı qlobal bərabərsizliklə bağlı hesabatda deyilir.

Tədqiqat zamanı bəlli olub ki, 2021-ci ildə dünya sərvətinin 3,5 faizinə sahib olan 2755 milyarder var və bu göstərici 2020-ci ilin əvvəlindəki pandemiyadan iki faiz çoxdur. 
Milyarderlərin ümumi sərvəti 13,1 trilyon dollardır. Pandemiya zamanı onlar sərvətlərini 4,1 trilyon dollar həcmində artıra biliblər.

Hesabatın həmmüəlliflərindən olan ekspert Lukas Şansel deyir ki, koronavirus böhranı zənginlərlə əhalinin qalan hissəsi arasında bərabərsizliyi daha da artırdı.

Bundan əlavə, hesabata görə, dünyada ən azı 19 milyon dollar sərvəti olan 520 min nəfərlik qrup var. Onlar dünya sərvətinin 11 faizinə sahibdirlər, keçən il bu rəqəm 10 faiz idi. 

Ekspertlər ən böyük bərabərsizliyi Rusiya və Mərkəzi Asiyada qeyd ediblər - kapitalın ümumi payında varlıların sayı 45,9 faiz təşkil edir. Ən aşağı bərabərsizlik Avropadadır (25,2 faiz). Ondan sonra Şərqi Asiya (30 faiz) və Cənubi və Cənub-Şərqi Asiya (34,3 faiz) gəlir.

Hesabat müəllifləri bəzi regional xüsusiyyətləri qeyd ediblər. Məsələn, gəlirlərin qeyri-bərabər bölgüsündə Latın Amerikası və Yaxın Şərq öndədir - sərvətin 75 faizindən çoxu ən zəngin 10 faizin əlindədir. Bunun ardınca Rusiya və Qara Afrika ölkələri (Saxaranın cənubu) gəlir. 

Maraqlıdır ki, ən zəngin insanlar ətraf mühitə daha çox mənfi təsir göstərirlər. ABŞ-da varlıların 10 faizi atmosferə ildə adambaşına orta hesabla 73 ton karbon qazı buraxır, ən yoxsul insanlar isə 10 tondan az karbon qazı buraxır.

Mürtəza
Ölkə.Az