Şabranda ana və oğlunu güllələyib öldürən şəxs yenidən HAKİM QARŞISINDA

Şabran rayonunda ana və oğlunu güllələyərək qətlə yetirməkdə təqsirli bilinən Nahid İslamovun cinayət işi üzrə ibtidai istintaq başa çatıb.

"Ölkə.Az" xəbər verir ki, cinayət işinin materialları baxılması üçün Bakı Ağır Cinayətlər Məhkəməsinə göndərilib.

Cinayət işi hakim Cavid Hüseynovun icraatına verilib.

İş üzrə məhkəmə hazırlıq iclası yaxın günlərdə keçiriləcək.

Qeyd edək ki, aprelin 11-də Şabranın Zeyvə kəndində 1986-cı il təvəllüdlü İslamov Nahid Eynulla oğlu gecə həmkəndliləri - 1963-cü il təvəllüdlü Mahmudova İstək Əlyar qızı və onun oğlu, 1983-cü il təvəllüdlü Məmmədov Məhəbbət Elman oğlunu ov tüfəngi ilə güllələyərək qətlə yetirib.

Araşdırma zamanı məlum olub ki, N. İslamov həyat yoldaşını qəsdən öldürdüyü üçün 13 il məhbəs həyatı yaşadıqdan sonra 2019-cu ilin yanvar ayında azadlığa çıxıb. Kənd sakinlərinin sözlərinə görə, qatil həyat yoldaşını namus üstündə öldürüb.

Azadlığa çıxdığı gündən də həyat yoldaşını öldürməsində səbəbkar saydığı həmkəndlisi Məhəbbət Məmmədovu öldürmək planı qurub.

Babasından qalma tüfəngi götürərək ilk öncə Məhəbbəti evlərinin arxasında güllələyib. Daha sonra isə səsə gələn anası İstək Məmmədovanı güllələyərək hadisə yerindən qaçıb.

Ölkə.Az