Bakıda atasına 20 bıçaq vuraraq öldürən oğul yenidən HAKİM QARŞISINDA

Bakıda atasını öldürməkdə təqsirli bilinərək məhkum olunan Laçın Novruzov Ali Məhkəməyə müraciət edib.

"Ölkə.Az" xəbər verir ki, onun müraciətinə dekabrın 16-da hakim Tahir Kazımovun sədrliyi ilə baxılacaq.

Qeyd edək ki, qətl hadisəsi Binəqədi rayonunun Müşviqabad qəsəbəsində baş verib.

Qəsəbə sakini, 1995-ci il təvəllüdlü Novruzov Laçın Mehman oğlu yaşadıqları evdə atası - 1965-ci il təvəllüdlü Novruzov Mehman Musa oğlu ilə mübahisə edib. Mübahisəyə səbəb isə atanın içkili olması olub. Mübahisə nəticəsində L .Novruzov M.Novruzovu 20 bıçaq zərbəsi endirməklə qətlə yetirib.

Təqsirləndirilən Laçın Novruzov ifadəsində bildirib ki, özünü dərk edəndən evlərində söz-söhbət olub: "Atamı öldürmək niyyətim yox idi. Elə fikrim olsaydı 17-18 yaşım olanda vurardım. Bizim evdə həmişə söz olub. Bütün qonşular da bilir ki, atam hər gün içib anama işgəncə verirdi. Həmin günü də onu öldürmək istəmirdim. Sadəcə mənim üstümə bıçaqla gəldi. Qorxudan vurdum. Həmin an şokdaydım. Amma belə olmasını istəməzdim. Bilmirəm heç necə oldu".

Xatırladaq ki, Laçın Novruzov Cinayət Məcəlləsinin 120.1-ci (qəsdən adam öldürmə) maddəsi ilə təqsirli bilinərək 10 il müddətinə azadlıqdan məhrum edilib.

Ölkə.Az