Bakıda həmyaşıdını bıçaqlayıb öldürən şəxs HAKİM QARŞISINDA

Bakı Ağır Cinayətlər Məhkəməsində tanışını qətlə yetirməkdə təqsirli bilinən İmaməli Xıdırovun cinayət işi üzrə məhkəmə hazırlıq iclası keçirilib.

"Ölkə.Az" xəbər verir ki, hakim Mahmud Ağalarovun sədrliyi ilə keçirilən prosesdə anket məlumatları dəqiqləşdirilib.

İş üzrə məhkəmə baxış iclası fevralın 16-na təyin olunub.

Qeyd edək ki, hadisə Nərimanov rayonu ərazisində qeydə alınıb. Rayon Prokurorluğuna şəhər sakini, 1992-ci il təvəllüdlü Rəşad Sadıqovun bıçaqlanması və aldığı xəsarətlərdən xəstəxanada ölməsi barədə məlumat daxil olub.

Dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Faktla bağlı Nərimanov rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.

İstintaqla hadisənin zərərçəkmişin tanışı, 1992-ci il təvəllüdlü İmaməli Xıdırov tərəfindən şəxsi münasibətlər zəminində aralarında yaranmış münaqişə zamanı törədilməsinə əsaslı şübhələr müəyyən edildiyindən o, şübhəli şəxs qismində tutularaq istintaqa cəlb edilib.

Ölkə.Az