Şamaxıda oğul 70 yaşlı atasını baltalayaraq qətlə yetirib

"Ölkə.Az" xəbər verir ki, hadisə Şamaxı şəhəri, Vəli Məmmədov küçəsi, 52 saylı mənzildə qeydə alınıb.

Rayon sakini, 1971-ci il təvəllüdlü Cahangirov Qadir Arif oğlu ailə münaqişəsi zəminində aralarında baş verən dava zamanı atası, 1947-ci il təvəllüdlü Cahangirov Arif Ağəli oğlunu baltalayaraq öldürüb.

Başından və bədənindən ağır zərbələr alan A.Cahangirov Şamaxı rayon Mərkəzi Xəstəxanasının reanimasiya şöbəsinə yerləşdirilib. Həkim səylərinə baxmayaraq yaralı dünyasını dəyişib. Hadisəni törədən Q.Cahangirov atasını ağır vəziyyətdə gördükdə həmin balta ilə öz başına zərbə vurub. O, xəstəxananın cərrahiyə şöbəsinə yerləşdirərək əməliyyat olunub. Alkoqol aludəçisi olan Q.Cahangirovun hadisə zamanı içkili vəziyyətdə olduğu bildirilir.

Təqsirləndirilən şəxs qismində dindirilən Qadir Cahangirov ifadəsində bildirib ki, 2012-ci ildə qızı Mahirə intihar etdikdən sonra əsəblərinin korlanıb. Həmin vaxtdan etibarən içkiyə qurşandığını göstərib. Hadisə baş verən gün oğlu çörəkbişirmə sexinə, arvadı ilə bacısı isə xadimə işlədikləri məktəbə gediblər. Saat 11:00-dan axşama qədər hissə-hissə araq içib. Axşamtərəfi arvadına yaxınlaşaraq araq almaq üçün ondan 1 mant pul istəyib:

"Yeganədən bir manat istədim. Dedi ki, sabah Bakıda yaşayan qızımgilə qonaq gedəcəyik, pul lazımdır. Buna görə mübahisəmzi düşdü, qışqır-bağır saldım. Atam yanıma gəlib Qurban bayramı günü araq içdiyimə görə məni danladıqda əsəbləşib onu da itələdim. Atam həyətin baş tərəfindəki talvara tərəf getdi. Həmişəki kimi ya çubuq, ya da dəmir parçası alıb üstümə gələcəyini bilirdim. Ona görə daxmaya qaçdım ki, balta götürüm. Bacım qarşımı kəsmək istədikdə onu itələyib yıxdım, odun doğradığımız baltanı daxmadan götürdüm. Atam əlində dəmir boru giriş qapısında dayanmışdı. Baltanın kəsici hissəsi ilə onu başına 4-5 zərbə vurdum. Zərbənin təsirindən yerə yıxıldı, başından qan axmağa başladı".

Qadir Cahangirovun sözlərinə görə atası həmişə onun yeyib- içməyinə qarışıb. Həmin gün yenədə onu sərxoş vəziyyətdə görüb danladığı üçün əsəbləşib balta ilə vurub atasını qətlə yetirib.

Məhkəmə prosesində təqsirləndirilən şəxs ittiham üzrə özünü təqsirli bilərək əməlindən peşman olduğunu bildirib.

Zərərçəkmiş şəxsin hüquqi varisi Nadir Cahangirov məhkəmədən ona ədalətli cəza verilməsini xahiş edib.

Məhkəmə hesab edib ki, Qadir Cahangirov CM-nin 120.2.3-cü ( zərərçəkmiş şəxsi ictimai borcunu yerinə yetirməsi ilə əlaqədar qəsdən adam öldürmə) və 120.2.4-cü (xüsusi amansızlıqla qəsdən adam öldürmə) maddələri ilə təqsirli bilinərək qanunla nəzərdə tutulan qaydada cəzalandırılmalıdır.

Sonda məhkəmənin hökmü ilə Qadir Cahangirov 17 il müddətinə azadlıqdan məhrum olunub.

Ölkə.Az