Bakıda kişi keçmiş arvadını küçədə qətlə yetirib

“Ölkə.Az” xəbər verir ki, hadisə Suraxanı rayonu Qaraçuxur qəsəbəsində baş verib. 35 yaşlı Xosrov Məmmədov keçmiş həyat yoldaşı, 33 yaşlı Əfsanə Məmmədova ilə küçədə mübahisə edib. Mübahisə zamanı o, Ə.Məmmədovaya çoxsaylı bıçaq xəsarətləri yetirib. Ağır bədən xəsarətləri alan qadın elə hadisə yerində dünyasını dəyişib.

Hadisədən sonra Xosrov Məmmədov könüllü olaraq DİN-nin “102” xidmətinə zəng edərək törətdiyi cinayət barədə məlumat verib və hadisə yerində polis əməkdaşlarının gəlməsini gözləyib.

İş üzrə dindirilən Xosrov Məmmədov ifadəsində bildirib ki, Əfsanə Məmmədova ilə 2003-cü ildə evlənib. Onun evdə hər gün spirtli içki qəbul etməsi və həyat yoldaşını döyməsi zəmnində aralarında yaranmış mübahisələrə görə Əfsanə 2016-cı ildə boşanmaq üçün məhkəməyə müraciət edib və məhkəmənin qərarı ilə nigahlarına xitam verilib.

Məhkəmənin qərarı ilə ona uşaqlara görə ayda 300 manat məbləğində aliment kəsilib. Boşandıqdan sonra yenidən Əfsanə ilə barışıb və 2018-ci il avqustun əvvəllərinə kimi birlikdə ailə kimi yaşayıblar.

İyul ayında qadın alimentlə bağlı icra şöbəsinə ərizə yazdığına görə münasibətləri daha da pisləşib. Onun barəsində belə bir ərizə yazmasını qəbul edə bilməyib və bu səbəbdən Əfsanəni döyüb. Qadın polisə zəng edərək döyülməsi barədə məlumat verib və 37-ci polis bölməsinə müraciət edib.

Xosrov Məmmədov ifadəsinin davamında bildirib ki, bir müddət sonra keçmiş yoldaşı uşaqları ilə birlikdə NZS qəsəbəsində kirayə ev tutub yaşayıb. Sentyabr ayında o özünə məxsus televizor və soyuducunu oradan götürmək üçün keçmiş yoldaşının yaşadığı evə gedib.

Qadın qapını açmadığı üçün hasardan aşaraq həyətə daxil olub. Qadının belindən tutaraq məişət əşyalarını götürməyə gəldiyini deyib.

Bir neçə gün sonra qadın rayon prokurorluguna güya həmin vaxt onu zorlaması ilə bağlı ərizə verib. Bununla əlaqədar prokurorluğa dəvət olunan Xosrov izahatında keçmiş arvadını zorlamadığını bildirib.

Əfsanənin barəsində etdiyi şikayəti ona pis təsir etdiyindən onu öldürmək məqsədi ilə mağazadan bıçaq alıb. Keçmiş arvadının hər həftənin 6-cı günləri bir qadının evinə təmizlik üçün getdiyini bildiyindən səhər tezdən evdən çıxıb həmin evin dayanacağında Əfsanənin gəlməsini gözləyib:

“Saat 11 olardı gördüm qızılma 81 nömrəli marşrutla gəlirlər. Məni görüb dayanacaqda düşmədilər. Təxminən 150 metr qabaqda avtobusdan düşüb ara yollarla həmin evə getdilər. Arxalarınca tez gedib tutdum Əfsanənin qolundan. Bıçağı çıxarıb onun saçından tutdum sonra qarnına, kürəyinə, sinəsinə bir neçə bıçaq zərbəsi vurdum. Arxası üstə yıxılan kimi döş qəfəsinə də bir neçə zərbə vurdum”.

Xosrov Məmmədov qadının hərəkətsiz olduğunu görüb əlindəki bıçağı yerə atıb. Sonra isə hadisə yerinə gələn polis əməkdaşlarına təslim olub.

Məhkəmə prosesi zamanı Xosrov Məmmədov elan olunmuş ittiham üzrə özünü qismən təqsirli bilib.

Məhkəm toplanan sübutlara qiymət verərək nəticəyə gəlib ki, təqsirləndirilən şəxsin əməllləri ibtidai istintaq orqanı tərəfindən düzgün ixtisaslaşdırılıb.

Sonda məhkəmənin hökmü ilə Xosrov Məmmədov 17 il müddətinə azadlıqdan məhrum olunub.

Ölkə.Az