73 bıçaq zərbəsi, oyandı qonağını öldürdüyünü bildi

"Ölkə.Az" xəbər verir ki, hadisə Xəzər rayonunun Buzovna qəsəbəsində baş verib. Qəsəbə sakini 31 yaşlı Cəfər Cəfərov yaşadığı evdə dostu Tahir Əkbərovla yeyib-içiblər. Elə yemək masası arxasında onların mübahisəsi düşüb. Mübahisə zamanı Cəfər Tahirə çoxsaylı bıçaq zərbəsi vurub.

Ağır bədən xəsarətləri alan Tahir Əkbərov elə hadisə yerində dünyasını dəyişib.

Məhkəmə tibbi ekspertizanın rəyinə əsasən mərhumun bədənində 73 ədəd bıçaq yarası aşkar edilib.

Cinayəti törətməkdə şübhəli bilinən Cəfər Cəfərov polis əməkdaşları tərəfindən saxlanılıb.

İş üzrə dindirilən Cəfər Cəfərov ifadəsində Bakıda Babək prospektindəki 72 saylı evin 79 nömrəli mənzilində qeydiyyatda olduğunu bildirib. Onun sözlərinə görə 2004-cü ildən ara-sıra Bakıya gəlməklə 2012-ci ilə qədər Rusiyada yaşayıb.

Atası Rusiyada anası isə qardaşı ilə birlikdə yaşayıb. Moskvadan qayıdandan sonra atasının Buzovna qəsəbəsində tikdiyi evdə məskunlaşıb.

Son zamanlar bekar və işsiz olduğundan daha çox spirtli içkidən istifadə edib. Çox içib və içkiləri qarışdıranda hərəkətlərini idarə edə bilməyib.

Aprelin 4-də evdə olan zaman pivə içib və saat 21:00 radələrində yaşadığı evin yaxınlığındakı marketə gedib. Marketdə olan zaman əvvəllər birlikdə eyni məhəllədə yaşayan Tahirlə rastlaşıb. Cəfər Tahiri evinə dəvət edib. Tahirlə birlikdə mağazadan araq, pivə və ərzaq alaraq birlikdə evə gəliblər.

Qonaq otağında süfrə açıb yeyib-içməyə başlayıblar. Tahirlə Bakıxanov qəsəbəsində birlikdə keçirdikləri vaxtlardan danışaraq araq içiblər.

Bundan sonra Cəfər Cəfərov heç nə xatırlamadığını, özünə gələndə isə Tahirin isə qan içində evin girəcək otağında yerdə olduğunu və əynindəki paltarların qana bulaşmış vəziyyətdə olmasını görüb.

Heç nə xatırlamayan Cəfərov 102 xidmətinə zəng edərək hadisə barədə məlumat verib.

Ölkə.az-ın əldə etdiyi məlumata görə, Tahiri həmişə üzərində gəzdirdiyi açılıb-bağlanan bıçaqla vursa da, səbəbi ona məlum olmayıb. Onunla aralarında heç vaxt ədavət olmayıb.

Məhkəmə prosesi zamanı Cəfər Cəfərov elan olunmuş ittiham üzrə özünü tam təqsirli hesab edib.

Məhkəmə müəyyən edilmiş hallara qiymət verərək nəticəyə gəlib ki, Cəfər Cəfərovun əməli CM-nin 120.2.2-ci(xuliqanlıq niyyəti ilə adam öldürmə) və 120.2.4-cü( xüsusi amansızlıqla qəsdən adam öldürmə) maddələri düzgün tövsif edilib.

Sonda məhkəmənin hökmü ilə 31 yaşlı Cəfər Cəfərov 14 il müddətinə azadlıqdan məhrum olunub.

Ölkə.Az