Çay evində dostunu çaydanla öldürdü

"Ölkə.Az" xəbər verir ki, hadisə ötən il oktyabrın 17-də, saat 20 radələrində paytaxtın Binəqədi rayonunda baş verib.

İttihama görə rayonun Rəsulzadə qəsəbəsi, Faiq Rüstəmov küçəsində yerləşən ikimərtəbəli çay evinin ikinci mərtəbəsində 1977-ci təvəllüdlü Cövdət Abbasovla 1958-ci il təvəllüdlü Sabir Ələkbərov arasında mübahisə yaranıb.

Mübahisə zəminində Cövdət Abbasov Sabir Ələkbərovun baş nahiyəsinə çaydanla bir neçə zərbə endirib.

Ağır zərbə alan Sabir Ələkbərovu yanlarında olan şəxslər oradan uzaqlaşdırıblar.
Bir müdət sonra həmin çay evinin qarşısında Sabir onu yenidən təhqir edib. Bu zaman Cövdət ona fasilələrlə çoxsaylı bədən xəsarətləri yetirərək qəsdən həyatdan məhrum edib. Hadisə yerinə gələn həkim briqadası onun öldüyünü qeyd edib.

Cövdət Abbasov hadisədən bir gün sonra yaşadığı evdə saxlanılıb.

İş üzrə təqsirləndirilən şəxs qismində dindirilən Cövdət Abbasov ifadəsində bildirib ki, Sabir Abbasovla təxminən 5-6 il əvvəl tanış olub və aralarında hər hansı ədavət olmayıb. "Hadisə baş verən günü Sabirlə ikimiz araq içdik sonra dedim ki, gedək çayxanaya nərd oynayaq. Çayxanada məndən telefonumu istədi ki, ver zəng edim. Məndə verdim. Həmin adama zəng çatmadığı üçün əsəbləşdi telefonumu vurdu stolun üstünə. Dedim niyə belə edirsən? Başladı mənə söyüş söyməyə".

Cövdət Abbasov daha sonra bildirib ki, Ələkbərovun yaşca ondan böyük olması səbəbindən ona əl qaldırmayıb. Sabir onunla əyləşdiyi masadan qalxıb digər masaya keçib. " Getdi başqa masada oturdu fikirləşdim ki, qayıdar. Bir az keçdi getdim ondan telefonumu istədim. Yenə söyüş söydü. Məndə cavab verdim başladıq dalaşmağa. Əsəbləşdim stolun üstündə olan çaydanı götürüb bir neçə dəfə vurdum başına".

Çayxanada olan digər şəxslər Sabiri çölə çıxarıb üzünə su vurublar. Sabir onu hədələyib söydü üçün yanına qayıdıb. Amma onu vurub vurmadığını xatıramır. Səhərisi gün polis əməkdaşları evinə gəlib Ələkbərovun öldüyünü deyiblər.

Məhkəmə prosesi zamanı Cövdət Abbasovun Sabiri xüsusi amansızlıqla qəsdən öldürməsi süsuta yetirilib. Onun əməli CM-nin 120.2.4( xüsusi amansızlıqla qəsdən adam öldürmə) maddəsi ilə düzgün tövsif olunub.

Sonda məhkəmənin hökmü ilə 1977-ci il təvəllüdlü Cövdət Abbasov 16 il müddətinə azadlıqdan məhrum edilmə cəzasına məhkum edilib.

Ölkə.Az