"Göl Əli" məhkəməyə müraciət etdi: güllələyib öldürmüşdü...
Tovuz rayonunda həmyerlisini güllələyərək qətlə yetirməkdə təqsirli bilinən Əli Şamıyev Ali Məhkəməyə ərizə ilə şikayət edib.
“Ölkə.Az” xəbər verir ki, onun şikayəti ilə bağlı məhkəmə baxış iclası dekabrın 14-də hakim Fərhad Kərimovun sədrliy ilə keçiriləcək.
Xatırladaq ki, 2019-cu ilin sentyabr ayında 1959-cu il təvəllüdlü Əli Şamıyev Tovuz rayonunda nümayəndəlik fəaliyyəti ilə məşğul olan 1963-cü il təvəllüdlü Firudin Ələkbərlini Tovuz şəhərində şəxsi münasibətlər zəminində odlu silahdan atəş açmaqla qəsdən öldürüb. Faktla bağlı dərhal hadisə yerinə polis və prokurorluq orqanları əməkdaşlarının iştirakı ilə baxış keçirilib, məhkəmə-tibb ekspertizası təyin olunub.
Faktla bağlı Tovuz rayon Prokurorluğunda Cinayət Məcəlləsinin 120.1-ci (qəsdən adam öldürmə) və 228.1-ci (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələri ilə cinayət işi başlanıb.
Ə.Şamıyevin F.Ələkbərlini qəsdən öldürməsinə kifayət qədər şübhələr olduğundan o şübhəli şəxs qismində tutulub.
Cinayət işi üzrə məhkəmə prosesi aprelin 8-də başa çatıb.
Gəncə Ağır Cinayətlər Məhkəməsində “Göl Əli” ləqəbi ilə tanınan, Tovuzda bir çox iri obyektləri, o cümlədən Zəyəm çayının üzərində hotel-istirahət mərkəzi və sair obyektləri olan Əli Şamıyev barəsində Cinayət Məcəlləsinin 120.1-ci (qəsdən adam öldürmə) və 228-ci (qanunsuz silah saxlama) maddələri ilə açılan iş üzrə məhkəmə prosesinin nəticəsi olaraq təqsirləndirilən şəxs 10 il 6 ay müddətinə azadlıqdan məhrumetmə cəzasına məhkum edilib.
Qeyd edək ki, qətlə yetirilən F.Ələkbərli 1993-1995-ci illərdə Tovuz rayon Məhkəməsinin sədri olub.
Əli Şamiyev isə Tovuz rayonunun keçmiş icra hakimiyyəti başçısı Tofiq Zeynalovla və “Azərbaycan Dəmir Yolları” QSC-nin keçmiş rəhbəri Arif Əsgərovla qudadır. “Göl Əli”nin qızları Tofiq Zeynalovun oğlu Qoşqar Zeynalovla və Arif Əsgərovun oğlu Rahib Əsgərovla evləniblər. Tofiq Zeynalov isə DYP şefi general Ramiz Zeynalovun qardaşıdır.
Ölkə.Az
