Bəraət alan qadın ərini necə öldürmüşdü? - TƏFƏRRÜATI

"Ölkə.Az" xəbər verir ki, o, əri ilə 7 il sevgili olub, valideynlərinin narazılığına baxmayaraq onunla ailə qurub. Lakin bu evliliyin ömrü cəmi il yarım çəkib…

Qadın danışır ki, evlənəndən sonra münasibət 180 dərəcə dəyişib. Məsuliyyətsizlik, şiddət, başqa qadınlara meyllilik faciəyə gətirib çıxarıb.

Kirayə haqqı ödənilmədiyinə görə hamiləlik dövründə bir neçə evdən çıxarılan 26 yaşlı qadın axırda gedib Lökbatanda atasıgilin həyətindəki evə sığınıb.

O, hadisə günü haqda danışır: “Həmin gün də məni döyürdü, qaçıb mətbəxə girdim, amma qapını bağlamağa imkan tapmadım, arxamca gəldi. Orada başımı şkafa vurdu, tutub boğmağa başlayanda əlindən canımı qurtarmağa çalışırdım. Elə vəziyyətdə idim ki, indi də o məqamı tam xatırlaya bilmirəm. Bıçaq mətbəxdə stolun üstündə idi, əlimi atıb götürdüm. Necə vurmuşam, heç bilmirəm. O, çıxıb getdi. Az sonra atamgilə keçəndə gördüm ki, qapının ağzında uzanıb, qan axır. Qışqırdım, valideynlərim gəldi, təcili yardım çağırdılar. Həkim gəlib dedi ki, artıq ölüb..."

Həyat yoldaşından 1 yaş böyük olan ər bir bıçaq zərbəsindən ölüb. Zərbə ürəyindən dəyib.

Ekspertiza Sevdanın üzərində xəsarətlərin, o cümlədən boynunda boğulmaya xarakterik izlərin olması barədə rəy verib.

Elə ona görə də məhkəmə bu hadisəni qəsdən adam öldürmə yox, zəruri müdafiə həddini aşma nəticəsində adam öldürmə kimi qiymətləndirib. Bu maddə ilə ona il yarım cəza təyin edilib. Bu da 8 noyabrda qəbul olunan Amnistiya Aktının təsiri altına düşdüyündən Sevda dəmir barmaqlıqlar arasından çıxıb, yaş yarımlıq qızının yanına gedib.