Sevdiyi qadını öldürüb zibilliyə atan şəxsə hökm oxunub

Gəncədə sevdiyi xanımı boğaraq qətlə yetirməkdə təqsirli bilinın Sərdar Cəfərovun cinayət işi üzrə məhkəmə prosesi başa çatıb.

Gəncə Ağır Cinayətlər Məhkəməsinin hakimi Faiq Mahmudovun sədrliyi ilə keçirilən prosesdə təqsirləndirilən şəxsə hökm oxunub.

Məhkəmənin hökmü ilə Sərdar Cəfərov  12 il 6 ay müddətinə azadlıqdan məhrum edilib.

Qeyd edək ki, hadisə 2021-ci il fevral ayının 19-da Gəncə şəhəri ərazisində qeydə alınıb.

Belə ki, şəhər sakini, 2002-ci il təvəllüdlü Musayeva Pərvin Xəqani qızının itkin düşməsi ilə bağlı Gəncə Şəhər Nizami Rayon Polis İdarəsinə məlumat daxil olub.

Daha sonra məlum olub ki, gənc qız qətlə yetirilib.

Araşdırmalarla P.Musayevanın tanışı, 2001-ci il təvəllüdlü Cəfərov Sərdar Saləddin oğlunun həmin tarixdə özünə məxsus avtomobildə qısqanclıq zəminində aralarında yaranan mübahisə zamanı onu boğaraq öldürüb. Daha sonra o, meyiti Gəncə şəhəri, Avtozavod qəsəbəsində yerləşən məişət tullantılarının atıldığı əraziyə atıb.

Faktla bağlı Gəncə Şəhər Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

S.Cəfərov şübhəli şəxs qismində tutularaq istintaqa cəlb edilib.