Bakıda qız qaçırdan iki əmioğlu şikayətçidir

Bakıda adam oğurluğunda ittiham olunan qohumlar yenidən məhkəməyə apellyasiya şikayəti veriblər.

"Ölkə.Az" xəbər verir ki, bu dəfə onların şikayətinə Bakı Apellyasiya Məhkəməsində hakim İlqar Murquzovun sədrliyi ilə baxılacaq.

İş üzrə məhkəmə baxış iclası fevralın 9-na təyin olunub.

Xatırladaq ki, ötən 2020-ci ilin mart ayında hüquq-mühafizə orqanları əməkdaşlarının keçirdiyi əməliyyat nəticəsində Elturan Daşdəmirov və onun əmisi oğlu Tərlan Daşdəmirov saxlanılıblar.

İstintaq orqanı tərəfindən Elturan Daşdəmirovun barəsində Cinayət Məcəlləsinin 144.1-ci (adam oğurluğu), Tərlan Daşdəmirovun barəsində isə Cinayət Məcəlləsinin 144.2.3-cü (bir qrup şəxs, qabaqcadan əlbir olan bir qrup şəxs və ya mütəşəkkil dəstə və ya cinayətkar birlik (cinayətkar təşkilat) tərəfindən adam oğurluğu törətmək) maddəsi ilə ittiham elan edilib.

Bakı Ağır Cinayətlər Məhkəməsinin hökmü ilə Elturan Daşdəmirova 9, Tərlan Daşdəmirova isə 8 il müddətinə azadlıqdan məhrum olunub.

Natiq
Ölkə.Az