Mətn ölçüsü:
  • 100%

"Hər iki əlində bıçaq üstümə gəldi"- Bakıdakı qətlin təfərrüatı - FOTO

Bakıda qonşusunu öldürməkdə təqsirləndirilən 1979-cu il təvəllüdlü Dostəli Abuzərovun cinayət işi üzrə təfərrüatlar məlum olub.

"Ölkə.Az" xəbər verir ki, hadisə Suraxanı rayonunda baş verib. Rayonun "Zeytun bağları" adlanan çöllük ərazisində 1979-cu il təvəllüdlü D.Abuzərov qonşusu, 1977-ci il təvəllüdlü Sərhəng Qədirovu bıçaqlayaraq öldürüb.
Keçirilən əməliyat tədbirləri nəticəsində Dostəli Abuzərov polis əməkdaşları tərəfindən saxlanılıb.

İş üzrə dindirilmiş Dostəli Abuzərov ifadəsində Sərhəng Qədirovu öldürmək niyyətinin olmadığını, sonuncunun əlində iki bıçaqla hücum etdiyini, məcbur olub özünü müdafiə edərkən zərbənin ona dəydiyini bildirib.

Qonşusu ilə aralarında düşmənçilik olmayıb. Sərhəng bacısını bıçaqladığına görə əvvəllər məhkum olunub. Həmçinin narkotik vasitə istifadəçisi olub. 

2018-ci ilin mart-aprel aylarında qonşusunun qəsəbədə ona narkotik verməsi və ya satması barədə şaiyə yaydığını eşidib. Bu barədə Sərhəngdən soruşanda sonuncu üzr istəyərək bir daha belə söz-söhbət olmayacağını bildirib. Lakin hadisədən 5-10 gün əvvəl eyni qaydada şaiyələrin təkrar yayıldığını eşidib. 

Sentyabrın 16-da taksi fəaliyyəti ilə məşğul olan Muxtarın köməkliyi ilə maşında olan əşyaları evə boşaldarkən Sərhəngin küçədə dayandığını görüb. Ona özünün narkotik satdığını amma onun adını hallandırdığını deyib. Qonşusu yanına gəlib bu söhbətin 6 ay əvvəl olduğunu və buna görə ondan üzr istədiyini söyləyib. Sonra hər üçü maşına əyləşib və Muxtar avtomobili Sərhəngin dediyi istiqamətdə sürüb.  

Dostəli Abuzərov ifadəsinin davamında bildirib ki, "Zeytunluq" adlanan əraziyə çatanda dayanmasını tələb edib və avtomobildən düşüb. Maşından düşəndə Sərhəngin hər iki əlində bıçaq olduğunu görüb. 

"Gördüm bunun hər iki əlində bıçaq var. Maşının o biri tərəfinə boruların olduğu tərəfə keçdik. Dedim ona ki, öz adından danış və bir də məhəllədə narkotik satma. Özün satırsan hamıya mənim satdığımı deyirsən. Bu vaxtı Sərhəng mənə bıçaqla zərbə vurmaq istədi ayağı sürüşüb yıxıldı yerə. Məndə yerdə sifətinə təpiklə zərbə vurdum. Ayağa qalxıb bir-birimizə bıçaqla zərbələr atdıq. Mənim atdığım bıçaq batdı Sərhəngin böyrünə".

Dostəli Abuzərov bildirib ki, Muxtarla birlikdə  Sərhəngi maşına mindirib xəstəxanaya aparıblar. Yolda əynindəki qara rəngli jileti çıxarıb qonşusunun yarasına sıxıb ki, qanaxmanın qarşısını alsın. 

Yolda fikrini dəyişərək qeyri-rəsmi yaşadığı qadının evinin yaxınlığında maşından düşüb və bıçaqları özü ilə götürüb. 

Keçirilən əməliyyat tədbirləri nəticəsində Abuzərov cinayətin səhərsi günü Xaçmaz rayonu ərazisində tutularaq istintaqa təhvil verilib.

Məhkəmə prosesi zamanı  Dostəli Abuzərov ittiham üzrə özünü təqsirli bilməyib. 

Zərərçəkmiş şəxsin hüquqi varisi təqsirləndirilən şəxsə ən ağır cəza verilməsini xahiş edib.

Sonda məhkəmənin hökmü ilə Dostəli Abuzərov 18 il 6 ay müddətinə azadlıqdan məhrum olunub.

Natiq