Anasına sürpriz edən arvadını səhər yuxudan oyadıb, bıçağı... - Bakıdakı qanlı cinayətin təfərrüatı - FOTO

Bakıda həyat yoldaşını bıçaqlayaraq öldürməyə cəhhdə təqsirli bilinən Ağa Yusubovun cinayət işi üzrə təfərrüatlar məlum olub.

"Ölkə.Az" xəbər verir ki, hadisə paytaxtın Sabunçu rayonu, Pirşağı qəsəbəsində qeydə alınıb.

Belə ki, 1981-ci il təvəllüdlü Ağa Yusubov həyat yoldaşı Günay Yusubova yaşadıqları evin qonaq otağında yerləşən divanda övladları ilə birlikdə yatdığı zaman onu yuxudan oyadaraq, sinə nahiyəsindən bir bıçaq zərbəsi endirib. Qadının qışqırıq səslərinə yanında yatan azyaşlı övladları oyanıb. A.Yusubov buna baxmayaraq, uşaqların gözləri önündə G.Yusubovaya xüsusi amansızlıqla bıçaq zərbələri vurmağa davam edib. Bu zaman cinayət aləti olan bıçağın tiyəsi əyilib və anası Tarifə Yusubova hadisənin baş verdiyi otağa gələrək onu kənara itələyib.

Daha sonra yaralı xəstəxanaya yerləşdirilib və həkimlərin səyi nəticəsində onun həyatını xilas etmək mümkün olub.

İstintaq dövründə A.Yusubovun barəsində Cinayət Məcəlləsinin 29,120.2.2-ci (Qəsdən adam öldürməyə cəhd, xuliqanlıq niyyəti ilə adam öldürmə cəhd) və 120.2.4-cü (Qəsdən adam öldürməyə cəhd, xüsusi amansızlıqla və ya ümumi təhlükəli üsulla adam öldürməyə cəhd) maddələri ilə ittiham irəli sürülüb.

Saxlanılan Ağa Yusubov ifadəsində bildirib ki, əvvəllər FHN-də xilasedici işləyib. 2012-ci ildə Günay Yusubova ilə evlənib və nikahdan iki övladları dünyaya gəlib. 

2002-ci ildən narkotik vasitələrdən istifadə edib və bununla əlaqədar bir neçə dəfə müalicə olunub. Son beş ildir ki, ailə münaqişələri yaranıb. Mübahisələrinə səbəb onun Günayı qısqanması olub. Xəyanətdən şübhələnsə də, bununla bağlı heç bir sübutu olmayıb. 

2021-ci il sentyabrın 5-də evdə söhbət edərkən Günay növbəti gün qayınanasının ad günü olmasını və uşaqları ilə birlikdə ona sürpriz edəcəyini söyləyib. Xəyanət etməsindən şübhələndiyi üçün arvadının sürpriz sözünü bu tərzdə deməsi onu narahat edib. Həmin sözdən belə nəticəyə gəlib ki, övladlarının atası o, yox başqa şəxsdi. Bütün gecəni yata bilməyib. 

Səhər saat 6 radələrində yatağından qalxıb mətbəxə keçib və bıçağı götürərək arvadını yuxudan oyadıb. Sübh tezdən nəyə görə onu oyatdığını soruşanda o, Günaydan ötən gün sürpriz sözünü nə üçün dediyini soruşub. Onun sualına cavab verməyən yoldaşı divanda yatan uşaqlarının üstünü örtməyə başlayıb. Əsəbindən bıçaqla Günayın sinə nahiyəsinə zərbə vurub. İkinci zərbəni həmin istiqamətdə vuranda kəsici alət əyilib. Otağa tələsik girən anası onu itələyib arvadı ayağa qalxaraq dəhlizə qaçıb. 

Ağa Yusubov ifadəsinin davamında bildirib ki, hirsi soyumadıqdan mətbəxə keçib başqa bıçaq götürəndə anası ardınca gələrək aləti yerə qoymasını tələb edib. 

Həmin gün polis əməkdaşları evə gələrək onu bölməyə aparıblar. 

Zərərçəkmiş şəxs Günay Yusubova ifadəsində göstərib ki, narkotilk vasitələrdən istifadə edən əri aqressiv olub. Əsassız olaraq onu qısqanıb. 

Sentyabrın 6-da ailəvi olaraq qayınanasının ad gününü qeyd etməyi planşladırıblar. Övladları ilə divanda yatarkən saat 6 radələrində Ağanın onu əli ilə silkələyib oyatmasını hiss edib. Yuxudan oyanıb nə istədiyini soruşduqda əri üstünə çıxıb əlindəki bıçaqla sinəsinə zərbə endirib. Ardınca Ağa ikinci zərbəni vurub. Qışqırıq səsinə uşaqları yuxudan oyanıblar. Bıçağı sinəsindən dartıb çıxaranda tiyəsi əyilsədə əri dayanmadan bədəninin müxtəlif nahiyyələrinə xəsarətlər yetirməkdə davam edib. Qayınanası otağa daxil olub oğlunun qarşısına keçərək ona qaçmasını bildirib. Darvazaya tərəf qaçarkən əri arxasınca gəlib. Saçından tutub ona həyətdən küçəyə çıxamağa imkan verməyib. Qayınanası qışqıraraq qonşuları köməyə çağırıb və Ağaya mane olmağa çalışıb. Səs-küyə gələn qonşuları onu ayağa qaldırıb və küçədə dayanan avtomobilə otuzdurub xəstəxanaya çatdırıblar. 

Günay Yusubova onuda əlavə edib ki, yoldaşı çox güman ki, narkotik vasitənin təsiri altında onu öldürmək istəyib. 

Məhkəmə prosesində Ağa Yusubov ittiham üzrə özünü tam təqsirli bilib.

Zərərçəkmiş Günay Yusubova təqsirləndirilən şəxsi bağışlamadığını qeyd edərək ona qanuna müvafiq cəza verilməsini istəyib.

Sonda məhkəmənin hökmü ilə Ağa Yusubov 14 il 6 ay müddətinə azadlıqdan məhrum edilib.