Mətn ölçüsü:
  • 100%

Nənə və qız nəvəsinə 91 bıçaq; polis olan atasını işə qatdı... - Bakıda 18 il sonra tutuldular - FOTO

Paytaxtda törədilən və 18 il sonra üstü açılan qətlin təfərrüatı.

"Ölkə.Az" xəbər verir ki, ittiham aktına görə, 18 il əvvəl 2004-cü ildə paytaxtın Yasamal rayon sakinləri - 1947-ci il təvəllüdlü Rəhilə Cəlilova və nəvəsi, 1989-cu il təvəllüdlü Aygün Əzizova birgə yaşadıqları mənzildə öldürülüblər.

Baş Prokurorluq və Daxili İşlər Nazirliyi tərəfindən həyata keçirilən istintaq-əməliyyat tədbirləri ilə Anar Ağalarovun mərhum xalası oğlu Teymur Məmmədov və sonuncunun qardaşı Fərid Məmmədli ilə qabaqcadan əlbir olan bir qrup şəxs halında R.Cəlilovanın xeyli miqdarda əmlakını ələ keçirmək məqsədi ilə ona məxsus mənzilə qanunsuz olaraq girib bıçaqla çoxsaylı xəsarətlər yetirərək R.Cəlilova və A.Əzizovanı qəsdən öldürmələrinə, daha sonra isə mənzildə olan 600 ABŞ dolları məbləğində pulu götürüb ələ keçirmələrinə əsaslı şübhələr müəyyən edilib.

Toplanan sübutlar əsasında F.Məmmədli və A.Ağalarova Cinayət Məcəlləsinin 120.2.1 (bir qrup şəxs tərəfindən qəsdən adam öldürmə), 120.2.4 (xüsusi amansızlıqla və ya ümumi təhlükəli üsulla adam öldürmə), 120.2.6 (başqa cinayəti gizlətmə və ya onun törədilməsini yüngülləşdirmə məqsədi ilə adam öldürmə) və digər maddələri ilə ittiham elan edilib.

Cinayətdə iştirak edən Teymur Məmmədovun isə 2021-ci il martın 17-də ürək çatışmazlığından dünyasını dəyişdiyi məlum olub.

İş üzrə dindirilmiş Anar Ağalarov ifadəsində bildirib ki, 2003-cü ildən atası, qardaşı və nənəsi ilə birlikdə Şamil Əzizbəyov küçəsində yaşayıb. Nənəsinin rəfiqəsi Rəhilə Cəlilova qonaqlıq olanda və ya bayramlarda evlərinə gəlib-gedib. Rəhilə Yasamalda birotaqlı evdə tək yaşayıb. Nənəsi arada bir az məbləğlərdə ondan borc pul alıb. Teymur Məmmədov Rəhilənin yaşadığı evi tanıyıb. Çünki vaxtaşırı gedib qadından pul alıb və gətirib nənəsinə verib.

2004-cü ildə aprelin 24-də evlərinə gələn Teymur ona deyib ki, az əvvəl Rəhilənin mənzilində olanda 10-15 min dollar civarında pul görüb. Xalası oğlu evə girib həmin pulu götürməyi təklif edib. Həmin ərəfədə Fərid Məmmədli də onlarda olub. Birlikdə evdən çıxıb taksi ilə Rəhilə Cəlilovanın yaşadığı binaya gəliblər. Teymur qapını döyüb. Rəhilə Cəlilova qapının gözlüyündən baxıb, "kimdir" - deyə soruşanda Teymur "mənəm, zəhmət olmasa, açardınız, sizə sözüm var" söyləyib. 

Qadın qapını açan kimi Teymur elə dəhlizdə bıçaqla qadına zərbələr endirməyə başalayıb. Xəsarətlər alan qadın arxaya gedərək qonaq otağının girişində yerə yıxılıb.

Anar Ağalarov bildirib ki, bu zaman dəhlizin sol tərəfindən dayanıb, arıq bir qız "nənə" - deyərək qışqırmağa başlayıb. Buna baxmayaraq Teymur döşəmədə uzanmış vəziyyədə qalan Rəhiləyə xəsarətlər yetirməkdə davam edib. Qızın nənə deməsi ilə Rəhilənin nəvəsi olduğunu başa düşüb və üzərinə qaçıb. Azyaşlı müqavimət göstərib, əl-qol atarkən onun qolarını tutub. Bu zaman Teymur Rəhiləni buraxıb yanına gəlib və o, qızın qollarından tutduğu vəziyyətdə uşağa xəsarətlər yetirməyə başlayıb. Fərid isə həmin an Rəhilənin yanında olub. Xeyli zərbədən sonra qız mətbəxin girişində döşəməyə yıxılıb. Xırıldayıb can verərkən o, mətbəxdə masanın üzərində olan bıçağı götürüb və ölümünü tezləşdirmək məqsədi ilə boğaz nahiyəsinə 2 dəfə zərbə endirib. Ümumilikdə 49 ədəd Rəhiləyə, 42 ədəd bıçaq xəsarəti isə Aygün Əzizovaya yetirilib.

Anar Ağalarov ifadəsinin davamında bidirib ki, bundan sonra giriş qapısının bağlı olmasını bir daha yoxlayıb mənzili axtarmağa başlayıblar. O, servantda olan qabların yanında qara rəngli kitabça görüb. Vərəqlədikdə arasından 600 dollar pul tapıb və bu barədə Teymurla Fəridə bildirib. 

Bundan sonra mənzildən çıxaraq qapını açarla bağlayıb, açarı da özləri ilə götürüblər. Taksi saxlayıb dolayı yollarla yaşadığı binanın qarşısına gəliblər. Avtomobildən düşəndə 400 dolları Teymura verib. Törətdikləri cinayət nəticəsində hər birinə 200 dallar qalıb. 

Hadisədən 4 gün sonra evlərinə zəng edən polis əməkdaşı nənəsinə Rəhilə Cəlilovanın öldürüldüyünü bildirib və onu Yasamal rayon prokurorluğuna dəvət edib. Səhərisi gün nənəsi prokurorluğa gedib. Nənəsinin axşama qədər orada saxlanılmasından narahat olub və qardaşı Azərə Rəhiləni və nəvəsini öldürdüyünü danışıb. 

Sabiq polis əməkdaşı olan atası şəxsi əlaqələri vasitəsi ilə öyrənib ki, nənəsi ilə mərhum qadın arasında telefon danışığı olub. Bu səbəbdəndə o, çağırılaraq dindirilib.  

Anar Ağalarov 2008-ci ildən xalası oğlu Teymurla narkotik vasitələrdən istifadə etməyə başlayıb. Həmin il evin yaxınlığında yerləşən rus kilsəsindən dini portretlər oğurladığına görə Nəsimi RPİ-nin 22-ci polis bölməsinin əməkdaşları tərəfindən tutulub. Həbs olunduqdan 3-4 gün sonra atası bölməyə gəlib. Görüş zamanı atasından köməklik etməsini tələb edib, əks təqdirdə qəsdən adam öldürmə cinayətinin də üstü açılacağını deyib. 

O, atasına Teymurla birlikdə Rəhilə Cəlilovanı və nəvəsini öldürdüklərini danışıb. Amma Fəridin adını çəkməyib. Atasına da bu barədə heç kimə danışmamasını və səbirli olmasını bildirib. 

Ağır Cinayətlər Məhkəməsinin hökmü ilə oğurluq maddəsi ilə təqsirli bilinərək 3 il müddətinə azadlıqdan məhrum olunub. İki ildən sonra vaxtından əvvəl cəzadan azad edilib. 

2014-cü yanvarın 1-də adam bıçaqladığına görə tutulub və məhkəmənin hökmü ilə 6 il 6 ay müddətinə azadlıqdan məhrum olunub. Bir gündən sonra atası infarktdan vəfat edib. 

Axırıncı dəfə 2021-ci il Nəsimi rayon məhkəməsinin hökmü ilə 1 il 6 ay müddətinə azdlıqdan məhrum olunub. 

***

Məhkəmə iclasında Anar Ağalarov ittiham üzrə özünü qismən təqsirli bilib. Fərid Məmmədli özünü təqsirli bilməyib. 

Zərərçəkmiş şəxsin hüquqi varisi bildirib ki, Anar Ağalarovun atası, anası və qardaşının bu cinayətdən xəbəri olub. Polis əməkdaşı olan atası 18 il bu qətlin üstünün açılmasına imkan verməyib. Onlar azyaşlı qızı amansızlıqla qətlə yetiriblər: "Bunu Allahda bağışlamayacaq". 

O, məhkəmədən təqsirləndirilən şəxslər ən ağır cəza verilməsini istəyib. 

Sonda məhkəmənin hökmü ilə Anar Ağalarov 16 il, Fərid Məmmədli isə 15 il müddətinə azadlıqdan məhrum olunub. 

Ölümü ilə əlaqədar Teymur Məmədovun barəsində cinayət təqibinə xitam verilib. 

Natiq