Mətn ölçüsü:
  • 100%

Külüng və bıçaqla bir nəfəri öldürdü, bir nəfəri isə ... - Zirzəmidəki qanlı cinayət - FOTO

Bakıda bir nəfəri öldürüb, bir nəfəri isə öldürməyə cəhddə təqsirli bilinən Şirvani Əhmədovun cinayət işi üzrə təfərrüatlar məlum olub.

"Ölkə.Az" xəbər verir ki, hadisə Xətai rayonu ərazisində baş verib. 1992-ci il təvəllüdlü Mingəçevir şəhər sakini Şirvani Əhmədov münaqişə zəminində külünglə Cəlilabad rayon sakinləri Samir Babayev və Nicat Cavayevə xəsarət yetirib. Hər iki yaralı xəstəxanaya yerləşdirilib. Həkimlərin müdaxiləsinə baxmayaraq Nicat orada ölüb.

Keçirilən əməliyyat tədbirləri nəticəsində Şirvanı Əhmədov saxlanılıb.

İş üzrə dindirilmiş Şirvani Əhmədov ifadəsində göstərib ki, 2011-ci ilin dekabr ayında restoranda ofisiant işlədiyi vaxt Şəki rayonundan olan Vüsal İsgəndərov və Tural Hümbətovla tanış olub. Bir müddət sonra o, Turalla şəhərdə görüşüb və sonuncunun Əhmədli qəsəbəsində yaşayış binasının zirzəmisində yaşadığını bilib. 

Şirvani kirayə haqqını ödəməkdə çətinlik çəkdiyi üçün Turalın yaşadığı zirzəmiyə köçüb. 
Təxminən 2012-ci ildə 8-ci kilometr bazarında Abiddin Babayev adlı şəxslə sonra isə sonuncunun vasitəsi ilə Nicat Cavayev, Samir Babayev və Vüqar Nəcəfovla tanış olub.  

Hadisədən 1 həftə əvvəl Abiddin ona 3 ədəd mobil telefon verərrək özündə saxlamasını və bir müddətdən sonra onları götürəcəyini deyib. Səhərisi gün Əhmədov telefonlardan birinin tanışı Ceyhun Həsənova məxsus olmasını öyrənib və həmin telefonu kafedə ona qaytarıb. Digər iki telefonu isə içkili vaxt yerə vuraraq sındırıb. 

İyunun 26-da axşam bazarın yanındakı parkda olan vaxt Samir, Vüqar və Nicatla rastlaşıb. Söhbət əsnasında onlar ondan Abiddin Babayevin ona verdiyi telefonları istəyiblər. O isə telefonları sonuncudan aldığını və ona da qaytaracağını bildirib. Bu səbəbdən aralarında mübahisə yaranıb. Parkda səs-küy salmamaq üçün Əhmədov onları sakitləşdirib yaşadığı zirzəmiyə aparıb. 

Şirvani Əhmədov ifadəsinin davamında bildirib ki, içəri daxil olan kimi Vüqara Nicat sol tərəfdə olan çarpayıda, Samir isə girişlə üzbəüz olan çarpayıda əyləşiblər. Şirvani isə qapının qarşısında dayanıb və ayaq altında olan külüngü divara söykəyib. 

Nicat Cavayev ondan təcili telefonları qaytarmasını tələb edib. Əks halda pis olacağını deyib və yerindən qalxaraq əl-qol atıb. Bu zaman Şirvani cəld külüngü götürüb Samir Babayevə güclü zərbə endirib. Amma sonuncunun həmin alətin dəstəyindən tutması ilə külüng onun əlindən yerə düşüb. Samirlə Vüqar onu itələyərək yerə yıxıblar və zirzəmidən qaçıblar. 

Əhmədov ayağa qalxaraq qapının yanına qoyduğu mətbəx bıçağını götürüb və arxa tərəfində dayanan Nicatın üstünə gedərək onun boğaz, qarın və baş nahiyyələrinə bir neçə zərbə vurub. Daha sonra zirzəminin pilləkənlərini qalxaraq Vüqarla Samirin oradan çox uzaqlaşdığını görüb geri dönüb. 

Şirvani bildirib ki, cinayəti törətdikdən sonra zirzəmidən özünə məxsus iki ədəd telefonu götürüb və hadisə yerindən qaçıb. Yolda qana bulaşmış bıçağı və telefonları tullayıb. 

Səhərsi gün Mingəçevir şəhərinə evlərinə gedərək anası ilə görüşüb. Üç gün sonra Bakıya qayıdaraq Xətai RPİ-nə gəlib və könüllü təslim olub. 

Məhkəmə prosesində Şirvani Əhmədov ittiham üzrə özünü tam təqsirli hesab edib.

Sonda məhkəmənin hökmü ilə Şirvani Əhmədov 15 il müddətinə azadlıqdan məhrum edilib.

Natiq