Trans "kriminal oğlanı" şantaj etdi - Bakıdakı şok qətlin təfərrüatı

Bakıda transı qətlə yetirməkdə təqsirli bilinən Mirşahid Mehdiyevin cinayət işi üzrə təfərrüatlar məlum olub.

"Ölkə.Az" xəbər verir ki, hadisə Qaradağ rayonunda qeydə alınıb. Rayonun Puta qəsəbəsi ərazisində 27 yaşlı Əhəd Nuriyevin üzərində zorakılıq əlamətləri olan meyiti aşkar edilib. Məlum olub ki, onun tanışı, 36 yaşlı Mirşahid Mehdiyev bıçaqlayaraq qətlə yetirib.

Keçirilən əməliyyat tədbirləri nəticəsində cinayəti törətməkdə şübhəli bilinən Mirşahid Mehdiyev saxlanılıb.

İstintaqa ifadə verən Mirşahid Mehdiyev 2021-ci ilin iyul ayında gecə saat 2:00 radələrində "20 yanvar" dairəsinin ətrafında "Kia" markalı avtomobildə iki nəfər qızın oturduğunu görüb və onların xanım olduqlarını zənn etdiyi üçün yaxınlaşıb tanış olmaq istəyib. Onunla söhbət edən sarı saçlı qız 100 manat pul müqabilində görüşdüklərini deyib. Avtomobilini bir az irəli verib saxlayıb və düşərək maşınlarına yaxınlaşıb. Sükan arxasında olan qara saçlı qıza onunla görüşmək istədiyini deyib. Özünü "Nunu" adı ilə təqdim edən qız avtomobilini rahat bir yerdə saxlayıb. Sarı saçlı rəfiqəsi düşüb başqa maşına tərəf gedib. Qara saçlı qız gəlib onun avtomobilinə əyləşəndən sonra "Gənclik" metrosu istiqamətində hərəkət edib. Yolda olarkən özünü Mirşahid kimi təqdim etdikdə "Nunu" ona telefonda adını Miron kimi qeyd edəcəyini deyib. Qız maşında mahnıya "xod" verib oynaya-oynaya mobil telefonla foto və video çəkməyə başlayıb. Videonu çəkərkən onu da görüntülərə daxil edib. Qıza çəkliş aparmamasını və evli olduğunu deyib.

Mirşahid bildirib ki, "McDonalds"a çatanda maşından düşüb ondan nə yemək istədiyini soruşub. Qız kişi səsi ilə cavab verəndə həmin şəxsin cinsi azlıq nümayəndəsi olduğunu anlayıb və ondan maşından çıxmasını tələb edib. Sonuncu ona etiraz edərək polisə şikayət edəcəyini, videogörüntünü yayacağını, ona 100 manat verməli və görüşdüyü yerdə düşürməli olduğunu bildirib. Problem yaranmaması üçün geri qayıdaraq qadın zənn etdiyi şəxsi "20 yanvar" dairəsi yaxınlığında düşürüb və ona 100 manat pul verib.

Bundan sonra Mirşahid tək hotelə qayıdıb. Otaqda oturub videonun yayılması haqqında düşünüb. Rusiyada kriminal aləmdə hörmətinin olmasından və bir cinsi azlıq nümayəndəsi ilə videosunun yayılmasından narahat olub. İnternetdə "Nunu" ləqəbli şəxsin gəlinlik paltarında görüntüsünün yayıldığını görüb.

Avqustun 12-də arvadı ilə övladını Türkiyəyə yola salaraq Bakıda tək qalıb. Ayın 13-ü gecə saat 2:00 radələrində "20 yanvar" dairəsinə "Nunu" ləqəbli Əhəd Nuriyevi tapmaq üçün yollanıb.
Ayın 13-dən 18-nə qədər onunla mütəmadi əlaqə saxlayıb. Videogürüntünü silməsini xahiş edəndə Əhəd onu silməyəcəyini söyləyib. Pul istəyən şəxsin bank hesabına 300 manat köçürüb. Buna baxmayaraq Nunu videonu silməyib və yenə onu şantaj etməkdə davam edib. Sonrakı günlərdə hesabına hissə-hissə daha 300 manat köçürüb.

Əhəd ona plastik sinə böyütmə əməliyyatı etdirmək istədiyini bildirib və pulları bu məqsədlə ondan aldığını deyib.

Avqustun 16-da Əhədlə görüşüb Gəncə şəhərinə sonra isə Göygöl rayonuna gedib. Bakıya çatanda Əhədə yenidən 400 manat verib.

Mirşahid Mehdiyev ifadəsinin davamında bildirib ki, avqustun 17-si saat 22:00 radələrində danışanda Əhəd onun yanında videogörüntünü siləcəyinə söz verib. Bu səbəbdən onu Xırdalan şəhərindən götürüb Xaçmaz rayonuna yollanıb. Bakıya qayıdarkən yolda videonu silməsini bildirəndə "Nunu" yenə ondan pul istəyib. Ona həkimlə danışdığını və 1-2 günə əməliyyata gedəcəyini deyib. Həmin vaxt cibində olan 2 min manat pulu ona vermək fikri olub. Lakin Əhəd artıq cinsiyyət orqanını da dəyişmək istədiyini və bu səbəbdən əlavə 10 min manat lazım olduğunu bildirib.

Artıq bundan əsəbiləşən Mirşahid videogörüntünü sildirə bilməyəcəyini başa düşüb.

Lökbatan-Qızıldaş yolunda hərəkətdə olarkən yol kənarında yarım tikili görüb və avtomobilini saxlayıb. Maşından çıxıb fikirləşməyə başlayıb. Əhəd də ardınca avtomobildən düşüb yanına gəlib.

"Maşından düşüb yolun kənarında daşın üstündə oturub başladım fikirləşməyə. Bu da gəlib oturdu yanımda. Dedim, nə istəyirsən məndən? Dedi, pul ver mənə. Bu zaman ayağa qalxıb tutdum başından, əydim aşağı, başladım zərbələr vurmağa. Bir neçə zərbə vurandan sonra yıxıldı yerə. Cibimdən kəsici aləti çıxardım birinci kürəyindən vurdun. Sonra yadımda deyil artıq neçə zərbə vurmuşam".

Əhəd Nuriyevi qətlə yetirdikdən sonra onun əl çatnasını yandırıb. Telefon şifrəli olduğu üçün açıb videonu silə bilməyib və onu həmçinin kəsici aləti tapılmaması üçün dənizə atıb.

Zərərçəkmiş şəxsin hüquq varisi Ağgül Nuriyeva ifadəsində göstərib ki, Əhəd Nuriyev onun kiçik oğlu olub.

1994-cü ildən 2007-ci ilə qədər Ağcabədi rayonunda yaşayıblar. 2017-ci ildə oğlu Əhəd Nuriyev Günel Nüriyeva ilə ailə həyatı qurub. Nikahdan bir övladları dünyaya gəlib. Doqquz aydan sonra onlar boşanıblar.

Bundan sonra oğlu müxtəlif ünvanlarda kirayədə qalıb. Ailə üzvlərinə taksi sürücüsü işlədiyini söyləyib.

2021-ci ildə atası öz adına avtomobil alaraq oğlu Əhədə verib. Həmin ilin iyul ayında oğlunun keçmiş arvadı onlara Əhədin "YouTube" kanalında gəlin paltarında videosunun yayılması haqda xəbər verib. Həmin videoya baxsa da, oğlu ilə münasibəti normal qalıb. Dəfələrlə Əhədə evlərinə gəlməsini bildirsə də, sonuncu səhv etdiyini və özünü bağışlaya bilmədiyini deyib. Əri İsmayıl Nuriyev oğlu ilə əlaqəni kəsib. Ayın 23-də ərini Qaradağ RPİ-nə çağırıblar və oğlunun öldürülməsi barədə məlumat veriblər.

Məhkəmə prosesində Mirşahid Mehdiyev ittiham ürə özünü təqsirli bilib.

Zərərçəkmiş şəxsin hüquqi varisi təqsirləndirilən şəxslə barışdığını və ona qarşı şikayəti olmadığını bildirib.

Sonda məhkəmənin hökmü ilə Mirşahid Mehdiyev qəsdən adam öldürmə maddəsi ilə təqsirli bilinərək 9 il müddətinə azadlıqdan məhrum olunub.

Natiq