İki qonşu bir yolu bölüşə bilmədi - Qətlin təfərrüatı -FOTO

Bakıda qonşusunu bıçaqlayaraq qətlə yetirməkdə təqsirli bilinən Zaur Manafovun cinayət işi üzrə təfərrüatlar məlum olub.

"Ölkə.Az" xəbər verir ki, hadisə Binəqədi qəsəbəsində baş verib.

Qəsəbə sakinləri Sərxan Mahmudov və Zaur Manafov münaqişə zəminində bir-birinə bıçaqla xəsarət yetiriblər. 

Xəstəxanaya yerləşdirilən yaralılardan S.Mahmudov dünyasını dəyişib. Z.Manafov Binəqədi Rayon Polis İdarəsinin əməkdaşları tərəfindən saxlanılıb.

Məlum olub ki, hadisədən əvvəl qonşusu Elçin maşını uyğunsuz yerdə saxlayıb, Zaur maşınını məhəllədən çıxara bilməyib.

Zaur qonşusundan maşınını geri çəkməsini istəyəndə, Elçin ona sərt cavab verib. Nəticədə onların arasında mübahisə yaranıb. Bu vaxt mübahisəyə Elçin Qədimovun qohumu Sərxan müdaxilə edib. Sərxan Zaur Manafova söyüş söyüb. Sonda hadisə qanlı olayla nəticələnib.

İş üzrə dindirilmiş Zaur Manafov ifadəsində Biləcəri qəsəbəsində fəaliyyət göstərən mebel sexində sürücü işlədiyini bildirib. Həmin gecə Sərxan Mahmudov "Qazel" markalı avtomaşınına əyləşib, onu irəliyə vermək istəyib. Lakin bir anlıq yadına düşüb ki, açar işlətdiyi gül salonunda qalıb. Buna görə orada işləyən qohumu Elçin Qədimovdan açarları gətirməsini xahiş edib. Sonuncu isə bunun əvəzində Zaura təkidlə yolda dayanan iki avtomobilin arasından keçə biləcəyini bildirib. Lakin Manafov oradan keçməkdən ehtiyat edib. Onların söhbətinə müdaxilə edən Zaurnun atası Elçinə iradını bildirib. Bu zaman Elçin onun atası ilə yüksək tonla danışıb. Bu səbəbdən mübahisə baş verib.

Zaur Manafov qeyd edib ki, Sərxan əvvəl onu itələdikdə o, müvazimətini saxlaya bilməyib yolun kənarına yıxılıb. Qarşılıqlı söyüşlərdən sonra Elçin yaxınlaşıb, ona şillə vurub. Əsəbiləşən Zaur idarə etdiyin maşından bıçağı götürərək gül salonunun yanına qayıdıb. Qapının şüşəsini ayağı ilə sındırıb uzaqlaşmaq istəyərkən Sərxan stulla əvvəl onun qolundan, ardınca bədəninə zərbələr endirib. Zaur Sərxanı əlindəki bıçaqla vuraraq qaçmağa başlayıb. Elçin Qədimov bıçaqla ona bel nahiyəsindən xəsarət yetirib. 

Təqsirləndirilən şəxsin sözlərinə görə, hadisə yerində kənar şəxslər olsa da, heç kim mübahisəyə müdaxilə etməyib. 

Evdə ailə üzvləri "102" və "103" xidmətlərinə zəng ediblər. Təcili yardımın gəlməsini gözləməyən Manafov dostunun avtomobil ilə xəstəxanaya gedib. Hadisə vaxtı şokda olduğundan bıçağı hara atdığını unudub. 

Elçin Qədimov Zaur Manafovu bıçaqla vurduğunu etiraf edib. Sonra taksi saxlayaraq yaralanan dostunu tanışı ilə birlikdə xəstəxanaya aparıb. Xəstəxanada yarım saat dayandıqdan sonra yaşadığı evə qayıdıb və səhər saat 8-də 4-cü polis bölməsinə gedərək təslim olub. 
Məhkəmə prosesində Zaur Manafov törətdiyi əməldən peşman olmasını bildirməklə Elçin Qədimovdan şikayəti olmadığını qeyd edib. 

Zərərçəkən Səfər Mahmudov ifadəsində Zaurla oğlunun arasında düşmənçilik və ya ədavət olmadığını göstərib. 

Məhkəmə hesab edib ki, Zaur Manafov CM-nin 120.2.2-ci (xuliqanlıq niyyəti ilə qəsdən adam öldürmə), Elçin Qədimov isə 128-ci (qəsdən sağlamlığa yüngül zərər vurma) maddəsi ilə təqsirli bilinərək cəzalanmalıdırlar.

Sonda məhkəmənin hökm ilə Zaur Manafov 17 il azadlıqdan məhrum olunub.

Elçin Qədimova 4 ay cəza təyin olunub. Lakin o, həmin müddəti istintaq dövründə çəkdiyi üçün cəzası bitmiş hesab edilib. 

Natiq