Sumqayıtda 2 nəfərin ölməsi ilə nəticələnən dəhşətli silahlı hücumun TƏFƏRRÜATLARI məlum oldu - YENİLƏNİB

Bu gün səhər saat 6 radələrində Sumqayıt şəhərində baş verən silahlı insidentlə bağlı bəzi təfərrüatlar məlum olub.

"Ölkə.Az" xəbər verir ki, evə ailəyə yaxın şəxs silahlı basqın edib. Nəticədə 1950- ci il təvəllüdlü Fərəcov Dağbəyi və onun qızı 1985-ci il təvəllüdlü Karakaş Suzana öldürülüb.

İnsident zamanı Süzana Karakaşın həyat yoldaşı Türkiyə vətəndaşı Sərkan Karakaş, Tərlan Fərəcova, 1958-ci il təvəllüdlü Mehman Mahmud oğlu Sarıyev və onun oğlu 1990-cı il təvəllüdlü Etibar Sarıyev ağır yaralanıblar.

"Ölkə.Az"ın əldə etdiyi məlumata görə qətlə yetirilən Suzana Karakaşla Türkiyə vətəndaşı olan əri Sərkan Karakaş Bakıda Qafqaz Universitetində bir yerdə təhsil alıblar. Onlar üniversitetdə tanış olduqdan sonra ailə həyatı qurublar.

Dünyasın dəyişən 73 yaşlı Dağbəyi Fərəcovun qəssab kimi çalışdığı bildirilir.

Aldığımız məlumata görə Türkiyə vətəndaşı Sərkan Karakaşın naməlum şəxslərə borcu olub.

***
Ötən gecə Sumqayıtda 2 nəfərin qətlə yetirilməsi ilə nəticələnən silahlı insidentin bəzi təfərrüatları üzə çıxıb.

“Qafqazinfo”nun əldə etdiyi məlumata görə, ilkin araşdırmalardan sonra qətlin münaqişə zəminində, ailəyə yaxın şəxs tərəfindən törədilməsi müəyyən edilib. Hazırda həmin şəxsin yerinin müəyyən edilərək saxlanılması istiqamətində iş aparılır.

Bildirilir ki, silahlı şəxs gecə saatlarında Sumqayıtda 16-cı mikrorayonda yerləşən fərdi yaşayış evinə gəlib. O, evə hücum edərək Dağbəyi Fərəcovu və onun qızı Suzana Karakaşı güllələyərək qətlə yetirib. Bu zaman Suzananın həyat yoldaşı Serkan Karakaş və anası Tərlan Fərəcova da güllə yarası alıb.

Qonşuluqda yaşayan və polis şöbəsində sahə müvəkkili vəzifəsində çalışan Etibar Sarıyev və atası Mehman Sarıyev də səs-küyə çıxaraq qonşularına kömək etmək istəyib. Bu zaman onlar da müxtəlif dərəcəli xəsarətlər alıb.

Dağbəyi Fərəcovun sahibkar olduğu və kafe işlətdiyi bildirilir.