Bakıda oğlan tələbələri ilə intim münasibətdə olan dekan niyə qətlə yetirilib? - CİNAYƏT İŞİ
Bakının Xətai rayonunda 1985-ci il təvəllüdlü Ə.S. şəxsi münasibətlər zəminində yaranan mübahisə zamanı tanışı İ.Q.-ni qətlə yetirib.
Ölkə.az teleqraf.com-a istinadən bildirir ki, Ə.S. yaxın münasibətdə olduğu, tez-tez Bakı şəhərində, müxtəlif ünvanlarda görüşüb birlikdə vaxt keçirdiyi, daim dəstək olması, mənəvi cəhətdən atalıq etməsi, müxtəlif məsələlərdə, o cümlədən dini məsləhətlər verməsi nəticəsində dərin hörmətini qazandığı, özü üçün müqəddəs insan hesab edərək şəxsiyyətinə pərəstiş elədiyi 1961-ci il təvəllüdlü, universitetdə şəriət fakültəsinin dekanı vəzifəsində işləmiş F.M. ilə 2011-ci ilin oktyabr ayı ərzində istintaqla müəyyən edilməyən günlərdə bir neçə dəfə Bakı şəhərində fərqli ünvanlarda görüşüb.
Bu vaxt F.M. Ə.S.-yə uzun müddətdir, tanıdığı 1974-cü il təvəllüdlü İ.Q.-nin mütəmadi olaraq ziyankarlıq etdiyini, buna görə də onu öldürməyin lazım olduğunu bildirib.
O, dekana ziyankarlıq etmiş istənilən şəxsi, həmçnin əvvəllər tanımadığı İ.Q-ni də heç bir təmənna olmadan öldürməyə hazır olduğunu bildirib.
Ə.S. ölüm sifarişini qəbul edib və özündə cinayət törətmək qətiyyətini yaradıb. O, hadisənin törədiləcəyi əlverişli yeri müəyyənləşdirmək məqsədilə dekanla birlikdə hədəfin yaşadığı Xətai rayonu, NZS qəsəbəsinə gedib. Orada ünvanı görməklə cinayəti törədəcəyi sahəni dəqiqləşdirib.
Ə.S. bir neçə dəfə həmin əraziyə gedib, orada qurbanı izləyib. Növbəti dəfə, yəni oktyabrın 31-də sifarişi yerinə yetirib.
Qətl hadisəsi 2011-ci ildə baş versə də, uzun illər üstü açılmayıb. Bu səbəbdən illərlə bağlı qalmış cinayət kimi istintaq orqanı arxivində yatıb.
Lakin son illər əvvəlki dövrlərdə bağlı qalmış cinayətlərin üstünün açılması istiqamətində Baş Prokurorluqda aparılan araşdırmalar zamanı bu cinayətin də üstünün açılması üçün cinayət işi tələb olunub və araşdırılıb.
Aparılan araşdırmalardan sonra qətlin törədilməsində günahkar bilinən şəxslər müəyyən edilib.
"Mənə bir mobil nömrə verdi ki..."
2022-ci il avqustun 24-də Ə.S. Cinayət Məcəlləsinin 120.2.5-ci (sifarişlə qəsdən adam öldürmə) maddəsi ilə nəzərdə tutulmuş cinayət əməlini törətməkdə şübhəli şəxs qismində tutulub.
İstintaq materiallarına əsasən hadisədən qısa müddət sonra, yəni 2011-ci il noyabrın 4-də qətlin sifarişçisi F.M. Bakı şəhərinin Xocalı prospektində avtomaşında sol dirsək oynağının ön səthini iti kəsici alətlə kəsərək intihar edib.
Ə.S.-nin cinayət işi baxılması üçün Bakı Ağır Cinayətlər Məhkəməsinə göndərilib. Cinayət işi hakim Səbuhi Hüseynovun sədrliyi ilə araşdırılıb.
Məhkəmədə təqsirləndirilən şəxs qismində ifadə verən Ə.S. ona elan olunmuş ittiham üzrə özünü təqsirli bilməyib. O bildirib ki, F.M. ilə yoldaşlıq münasibəti olub: "O, mənə ölən şəxslə ədavəti olduğunu, bir müddət sonra onunla NZS qəsəbəsində görüşəcəyini deyib, mənim də onun yanında olmağımı istədi.
F.M. məni bir dəfə İ.Q-nin yaşadığı yerə aparmış, onun evini mənə göstərmişdi. Mənə bir mobil nömrə vermişdi ki, görüşə gedəndə onunla tez və rahat əlaqə saxlayım. Hadisənin üzərindən uzun müddət keçdiyindən hazırda mobil nömrəni xatırlamıram".
"Arxadan zərbə vurdu"
Ə.S-nin sözlərinə görə, hadisə baş verən günü dekanın verdiyi nömrəyə zəng edərək qurbanla NZS ərazisində, onun yaşadığı evə doğru gediblər:
"Mən NZS qəsəbəsində İ.Q-nin yaşadığı evə tərəf hərəkət etməyə başladım. İkisinin də yanına çatdıb salamlaşdım. İ.Q.-ni əvvəllər heç vaxt görməmişdim.
O məni görəndə dekana narazılığını bildirdi. Dekan İ.Q.-ni qırağa çəkərək söhbət etməyə başladı. Mənə isə dedi ki, bir az kənarda dayanım. Onlardan 6-7 metr kənara çəkildim.
İ.Q. üzünü mənə tutaraq söyüşlə təhqir etdi, ora niyə gəldiyimi soruşdu. Mən də onu təhqir etməyə başladım. Mənə tərəf gəlmək istəyəndə F.M. arxadan ona bıçaqla bir zərbə vurdu. Sonra əli ilə onu özünə tərəf çəkib sinə nahiyəsindən də bir zərbə endirdi. O, yerə yıxıldıqdan sonra üstünə çıxdı. Onları ayırdım.
Daha sonra F.M. bir istiqamətə, mənsə əksinə doğru getdim. Taksiyə əyləşərək "Neftçilər" xəstəxanasının yaxınlığına gəldim. Taksiyə əyləşəndə "Neftçilər" dedikdə, metro stansiyanın yaxınlığını nəzərdə tutsam da, taksi sürücüsü "Neftçilər" xəstəxanasını başa düşmüşdü.
Daha sonra "Neftçilər" xəstəxanasının yanından "Xalqlar Dostluğu" metro stansiyanın yaxınlığına getdim".
"Tələbələri ilə intim əlaqəsindən xəbərim olmayıb"
Təqsirləndirilən şəxs qeyd edib ki, həmin ərazidən də 2015-ci ilə kimi yaşadığı mənzilə gedib:
"F.M-in mənə verdiyi nömrəni sındırıb küçəyə atdım. Mən onunla qonşum vasitəsilə tanış olmuşdum. Onda universitetdə işləyirdi. Mən universitetə qəbul üçün imtahan versəm də, qəbul ola bilməmişdim.
F.M. ilə daimi istifadə etdiyim mobil nömrə vasitəsilə əlaqə saxlayırdım. Nömrəni şəxsiyyət vəsiqəsi təqdim etmədən aldığım üçün həmin nömrənin kimin adına qeydiyyatda olduğunu bilmirəm. Hadisə baş verməmişdən qabaq, 1 ay əvvəl onunla bir-iki dəfə görüşmüşəm. Görüşüb söhbətləşərkən İ.Q ilə arasında problem olduğunu demişdi. Lakin problemin məzmunu barəsində mənə heç nə söyləməmişdi. Onu namaz qılan, dindar şəxs kimi tanımışam. F.M. ilə tələbələri arasında intim əlaqədən xəbərim olmayıb.
Onun mənə verdiyi mobil nömrəni istifadə etmək üçün tanışımın mobil telefonunu götürmüşəm. Mənə mobil nömrə verməsi məndə şübhə oyatmayıb.
Hadisə yerinə F.M. ilə birlikdə hadisədən əvvəl bir dəfə gündüz vaxtı da getmişdik. Hadisə baş verən gün onunla bir neçə dəfə telefonla danışmışdıq. İ.Q. ilə saat 23.00-da görüşməsi məndə heç bir şübhə yaratmadı.
Görüşəcəkləri yeri mənə hadisə baş verməmişdən qabaq yalnız bir dəfə göstərib. Hadisə zamanı üzərimdə bıçaq olmayıb, heç bir dükandan da bıçaq almamışam. Onlar birgə hadisə yerinə gəlib, mən isə tək getmişəm".
"Dedilər, qan azlığından ölüb"
Təqsirləndirilən şəxs bildirib ki, hadisədən sonra telefonla danışarkən F.M. ona polis bölməsinə gedəcəyini bildirib: "Məni Baş Prokurorluğa çağırıb NZS ərazisində baş vermiş cinayət hadisəsini törətdiyimi və onlara bu məlumatı tanışım Anarın çatdırdığını bildirdilər. Anara NZS ərazisində ölüm hadisəsinə şahid olduğumu demişdim. Lakin öldürən və ölənin adını ona deməmişəm.
F.M.-nin oğlunu qiyabi olaraq tanıyıram və onun evinə hadisədən qabaq bir neçə dəfə getmişəm. F.M.-in oğlunun zavodda müdir vəzifəsi tutduğu barədə məlumatım olmayıb. O, oğlunun İ.Q. ilə birlikdə çalışmasını deməyib. Onunla hansı səbəbdən ədavəti olduğunu da deməyib.
Mən Anara araşdırılan ölüm hadisənin harada, hansı şəraitdə törədilməsi ilə bağlı heç bir məlumat verməmişəm. F.M.-in evində təmir işlərini mən aparmışam, hadisədən sonra onun baldızının qızı ilə evlənmişəm. Onun yas yerinə getmişəm, onun qan azlığı xəstəliyindən əziyyət çəkməsi səbəbindən öldüyü bildirilib. F.M.-in ətrafında olan insanları tanımamışam".
"Mənə atalıq etdi"
Məhkəmə təqsirləndirilən şəxsin hazırkı ifadəsi ilə ibtidai istintaq zamanı verdiyi ifadəsi arasında ziddiyyətlər müəyyən edilib. Bu səbəbdən onun ibtidai istintaq zamanı verdiyi ifadəsi açıqlanıb.
Həmin ifadədən məlum olur ki, anadan olduğu vaxtdan 2015-ci ilə qədər anası ilə birlikdə yaşayıb: "Atam 1996-cı ildə rəhmətə gedib. Anam isə uzun müddət xadimə (süpürgəçi) işləyib. Mən demək olar ki, çöl şəraitində - küçədə böyümüşəm.
Nizami rayonunda yerləşən əvvəlcə 109, daha sonra isə 277 saylı orta məktəblərdə təhsil almışam. Dövlət Sərhəd Xidmətinin Cəlilabad rayonunda yerləşən "N" saylı hərbi hissəsində xidmətdə olmuşam. Hərbi xidmətdən qayıdandan sonra əvvəlcə müxtəlif yerlərdə fəhləlik etməyə, sonra isə elektrik işini öyrənib elektrik ustası olaraq işləməyə başlamışam.
Mərhum F.M.-i hərbi xidmətə gedəndən əvvəl onun tələbələrindən biri olmuş tanışıma görə dindar bir şəxs kimi tanımışam. Hazırda tələbəsinin bacısı onun oğlunun arvadıdır. Tanıdıqdan sonra F.M.-ə bir din adamı kimi, ağsaqqal insan kimi hörmətim getdikcə artıb. O mənə ata oldu, atalıq etdi. Həmişə yüksək dəyər vermişəm və heç vaxt sözündən çıxmamışam".
"Evində elektrik işi görən zaman..."
Təqsirləndirilən şəxsin sözlərinə görə, F.M. universitetdə dekan işləyib, "Ruslan 93" marketin arxasında yeddinci mərtəbədə ailəsi ilə birlikdə yaşayıb: "Mən tez-tez həm baş çəkmək, həm də həyati məsləhətlər almaq, nələrisə öyrənmək məqsədilə onun evinə getmişəm. Adətən, özü məni evinə çağırırdı. Belə-belə həmin ərəfələrdə arvadı, oğlanlarını tanımışam. Lakin həmin ərəfədə yalnız salam-sağol münasibətlərimiz olub.
Mənim yaşadığım mənzilə heç vaxt gəlmirdi. Lakin dəfələrlə məni taksi, yaxud digər şəxslərin avtomobili ilə yaşadığım binanın və ya blokun qarşısında düşürüb. Ümumiyyətlə, onun özünün istifadəsində avtomobil yox idi. Xatırlamadığım 2 mobil nömrəsi və 2 mobil telefonu vardı.
Onunla hər iki mobil nömrəsi ilə əlaqə saxlamışam. Ölümündən sonra onun evində elektrik işi görən zaman arvadının bacısı qızını görərək bəyənmişəm. Bu barədə qızın bacısının əri və əsgər yoldaşım ilə danışmışam. 2015-2016-cı illərdə nişanlanıb, daha sonra isə ailə qurmuşam".
"Dəfələrlə məni sorğu-suala çəkdi"
Təqsirləndirilən şəxs bildirib ki, zərərçəkmiş İlkini öldürülməsindən təxminən bir ay əvvəldən F.M. ona bir neçə dəfə söz salaraq adam öldürə bilib-bilməyəcəyini soruşub: "Mən isə onu özünə uca şəxsiyyət bildiyimə və hədsiz məhəbbətim olduğuna görə onun xətrinə istənilən şəxsi öldürməyə hazır olduğumu demişəm.
Hadisədən təxminən 1 həftə əvvəl F.M. məni yaşadığı evə çağırdı. İlk dəfə açıq şəkildə İlkini öldürmək lazım olduğunu bildirdi. Lakin nə üçün öldürmək lazım olduğunu demədi və heç nə vəd etmədi.
Mən ölən şəxsi tanımamışam. Həyatda heç vaxt qarşılaşmamışıq. F.M. xeyli vaxtdır İ.Q-ni öldürmək istədiyinə görə 1 ay cinayəti törətməyə razı olub-olmayacağımı, yaxud etibarlı olub-olmadığımı hər dəfə mənə suallar verməklə yoxladı. Mən təmənnasız olaraq və birbaşa razılıq verməyimə baxmayaraq nə üçün öldürtmək istədiyini bilmədim.
Xeyli vaxt keçdiyinə görə ardıcıllığı dəqiq xatırlamıram. Lakin yadımdadır ki, razılıq verəndən sonrakı günlərdə onun hansısa restoranda toy mərasimində çəkilmiş masa ətrafında əyləşmiş şəkilini göstərdi".
"Yerləri dəqiqləşdirdim"
Təqsirləndirilən şəxs qeyd edib ki, F.M. günorta saatlarında onunla birlikdə tanımadığı və xatırlamadığı taksi avtomobili ilə NZS qəsəbəsinə gedib: "İ.Q.-nin yaşadığı evi, həmin evə doğru ana yoldan ayrılan yolu, taksi ilə qurbanın düşürəcəyi yeri və hadisə yeri olan "qarajlar tərəfi", yəni təxminən 2 metr eni, 20-30 metr uzunluğu olan dar bir yolu əyani olaraq göstərdi. Taksi sürücüsü F.M.-nin nə məqsədlə mənə həmin yerləri göstərməsini bilmədi.
Bundan sonra 1, yaxud 2 dəfə özüm də cinayətə hazırlaşmaq məqsədilə həmin yerlərə tək getdim, gəzərək İ.Q-nin əsas yoldan piyada gələ biləcəyi və mənim gizlənə biləcəyim yerləri dəqiqləşdirdim.
F.M. cinayət törədilən zaman telefon əlaqəsi saxlamaq üçün mənə mobil nömrə verdi. Həmin ərəfədə 15, yaxud 20 manat müqabilində 20 Yanvar dairəsinin yaxılığında dükanlardan birindən bıçaq əldə etdim və hadisə gününə qədər evimdə saxladım. Bıçaqdan ailə üzvlərim məlumatsız olublar".
"Məqsədim izi itirmək idi"
İfadəyə görə, hadisə günü, yəni 31 oktyabr 2011-ci ildə günorta saatlarına qədər F.M. ilə telefon əlaqəsi saxlayıb: "Mənə həmin gün İ.Q. ilə evdən çıxararaq özü ilə harasa aparacağını, geri qayıdaraq evinin yanında, mənə göstərdiyi küçənin başında taksidən düşürəcəyini bildirdi. Bundan sonra evə piyada gedəcək İ.Q.-ni yolda öldürməyi mənə tapşırdı.
Mən də razılaşaraq qabaqcadan plana uyğun əynimə cins şalvar və cins gödəkçə geyindim, bıçağı gödəkçəmin iç yan cibində bağlanmış vəziyyətdə evdən çıxdım. Əynimə geyindiyim köhnə paltarları məhz onu öldürəndən sonra atmağım üçün qabaqcadan özüm seçmişdim.
Evdən çıxaraq əvvəlcə tanışımla əlaqə saxlayaraq yaşadığı evin yaxınlığında görüşdüm. Onun müvəqqəti olaraq istifadəsində olan "Nokia" markalı sadə modelli mobil telefonunu istədim. Əvvəllər ondan mobil telefon istədiyimi xatırlamıram. Amma özüm əvvəllər ona 1-2 dəfə telefon hədiyyə etdiyimə görə həmin gün mənə etiraz etmədi.
Evə qayıdaraq öz mobil nömrəmi və markasını xatırlamadığım mobil telefonunu işlək vəziyyətdə evdə qoydum. Telefonunumu evdə qoymaqda məqsədim guya evdə olmağım barədə görüntü yaratmaq, Anarın telefonunu götürməkdə məqsədim isə sadə model telefonların antenaya düşmədiyini eşitdiyim üçün izi itirmək idi".
"Dar küçədə yaxaladım"
Təqsirləndirilən şəxs qeyd edib ki, daha sonra NZS qəsəbəsinin yaxınlığına gəlib və F.M.-ə zəng edərək artıq hadisə yerində olduğu barədə məlumat verib: "O, evdə idi. Sonra da bir neçə dəfə də telefon əlaqəsi yaratdım. F.M. İ.Q. ilə evdən çıxdıqlarını, daha sonra birlikdə getdikləri yerdən çıxıb geri qayıtdıqlarını xəbər verdi.
Bundan sonra qabaqcadan razılaşdığımız yerə, yəni qurbanın evinə doğru uzanan küçənin başında gözləməyə başladım. Az sonra xeyli zaman keçdiyinə və həmin vaxt həyəcanlı olduğuma görə rəngini və markasını xatırlamadığım bir avtomobil məndən təxminən 20 metr aralıda dayandı. İ.Q. avtomobildən düşdü. Eyni anda F.M. zəng edərək onun avtomobildən düşdüyünü dedi.
Təxminən 100 metr boyunca təxminən 20 metr ara məsafəsi ilə qurbanın ardınca düşdüm. Sonra ara məsafəsini azaldaraq lap yaxınlaşdım. Bıçağı çıxararaq hazır vəziyyətdə sol əlimdə tutdum. İ.Q-nin evinə yaxın qaranlıq dar, cığıra oxşayan bir ara yol vardı. Oraya keçəndə ətrafın qaranlıq və sakit, kimsəsiz olmasını fürsət bilərək arxa tərəfdən hücum etdim, bıçaqla ilk zərbəni üstdən aşağı kürək nahiyəsinə endirdim.
Sağ çiyni üstə mənə tərəf çevrildi. Bundan sonra sinə və qarın nahiyələrinə ardıcıl bıçaqla zərbələri endirdim. O, yerə yıxılaraq mənə tərəf təpik atdı, həmçinin qışqıraraq kömək istədi. Ətrafdakı pəncərələrdə işıqlar yandığını hiss etdim və dərhal oradan uzaqlaşmağa başladım. Onun yerdən qalxaraq təxminən 20 metr aralıda yerləşən iki mərtəbəli binanın blokuna tərəf qaçdığını gördüm.
Təxminən yüz metr qaçaraq taksiyə əyləşdim və taksiçidən yaşadığım ünvanın yerləşdiyi əhatəni nəzərdə tutaraq "Neftçilər"ə sürməsini xahiş etdim. Lakin taksinin geri qayıdıb hadisə yerinə tərəf istiqamət aldığını görəndə özümü itirdim. Sürücüyə "Neftçilər xəstəxanası"na tərəf sürməsini istədim. Taksi məni "Neftçilər xəstəxanası"nın qarşısına gətirdi.
Orada isə başqa tanımadığım taksi ilə "Xalqlar dostluğu" metro stansiyasının yaxınlığına gəldim. Piyada binaların arası ilə evimə tərəf getdim. Yolda 369 saylı mobil nömrəni sındıraraq xatırlamadığım yerə atdım".
"İntim münasibətim olmayıb"
Təqsirləndirilən şəxs deyib ki, hadisə zamanı hər hansı xəsarət almayıb: "Əynimdəki paltarların çöl səthi qana bulaşmayıb və ehtiyat üçün paltarlarımı salafana yığıb ertəsi gün evdən uzağa apararaq zibil qutusuna tulladım. Bıçağı isə su ilə yuyub təmizlədim. F.M. intihar edəndən sonra bulvara gedərək Xəzər dənizinə atdım.
Evə daxil olan ərəfədə F.M. mənim nömrəmə zəng vurdu və danışıq zamanı üstü örtülü formada "tapşırdığınız işi həll etdim" dedim. O isə mənə hadisə ilə bağlı polisə çağırıldığını bildirdi. Növbəti günlərdə ifşa olunmamağım üçün F.M.-dən uzaq oldum. Nə telefonla danışdım, nə də əyani görüşdüm. Onun intihar edəcəyindən qabaqcadan məlumatım olmayıb. Yalnız intihardan sonra zəng edərək hadisə barədə xəbər verdilər, məscidə çağırdılar.
Hadisəni ürəyimdə daşımaq ilk əvvəllər mənə ağır olduğuna görə F.M. öləndən qısa müddət sonra həmin ərəfələrdə daha yaxın olduğum dostuma NZS qəsəbəsində bir adamı bıçaqla vurub öldürdüyümü etiraf etdim. Ona tapşırıq ilə bu cinayəti törətdiyimi də deməmişəm.
İ.Q-ni öldürməyim barədə başqa heç kimə danışmamışam. Bu cinayətin törədilməsində başqa iştirakçı olmayıb. Mənim F.M. ilə hər hansı intim münasibətim olmayıb. Firudinin başqa cinayət törədilməsini təşkil edib-etməməsini də bilməmişəm".
"Elçiliyi F.M. müəllim etdi"
İş üzrə zərərçəkmiş qurbanın hüquqi varisi qismində ifadə verən həyat yoldaşının sözlərinə görə, mərhumla rəsmi qaydada ailə həyatı qurub:
"Toydan sonra Bakı şəhərində NZS qəsəbəsində kirayədə yaşamışıq. Ailədə həmişə çox mehriban olmuşuq. Rəsmi nikahdan iki övladımız doğuldu. Ailə qurandan sonra yoldaşım NZS qəsəbəsində bir otaq kirayə götürərək dərzi fəaliyyəti ilə məşğul olurdu. Eyni zamanda işləyə-işləyə universitetin ruhanilik fakültəsinə də qəbul oldu.
2010-cu ildə təhsilini bitirərək diplomunu alsa da, həmin ixtisas üzrə heç bir vaxt işləməyib. Onun universitetdə təhsil aldığı müddətdə kiminlə oturub-durmasını bilməsəm də, universitetdə müəllim işləyən F.M. ilə çox yaxın olduqlarını bilmişəm.
O müəllim yoldaşımın elçiliyinə gəlib, bizim toyumuzu maliyyələşdirib. Toydan sonra da dəfələrlə İ.Q.-yə pul verib. Daha sonra yoldaşım Əmlak Komitəsində sürücü işləyən şəxs vasitəsilə orada işləyən R. ilə tanış oldu. Tanışlıqdan sonra İ.Q. bir neçə dəfə sürücüsünün işi olduğundan onun avtomobilini idarə edərək Gəncə şəhərinə və Cəlilabad rayonuna aparıb.
Yoldaşım həm F.M., həm də R. ilə tanışlığı dostluğa çevrildi. Bayram günləri, ad günlərində bir-birilərinin evinə gedib-gəlirdilər. Ailəlikcə çox mehriban münasibətləri yaranmışdı".
"Kişilərlə intim münasibətini bilməmişəm"
Hüquqi varis qeyd edib ki, 2010-cu ilin axırlarında İ.Q. Sabunçu rayonu ərazisində yerləşən ASC-nin səhmdarlarından biri olub: "Lakin hansı miqdarda səhmə malik olması, həmin səhmi hansı vasitə ilə almasından xəbərsiz qalmışam. O özü də bu barədə mənə heç nə danışmayıb.
Yoldaşının deməsinə görə, zavodu onun adına həmin vəzifəli şəxs keçirib və zavoda rəhbərlik etdiyinə görə 500 manat əməkhaqqı alıb.
2010-cu ilin yay aylarında İ.Q. Maştağa qəsəbəsində hər sotunu 800 ABŞ dollara olmaqla beş sot torpaq sahəsi aldı və orada ev tikməyə başladı. Onun deməsinə görə, zavodda olan köhnə dəzgahların dəmirlərini sataraq həmin pulla evi tikdirib.
Bəzən evə gəlmir və bunu iş yerində qalması ilə izah edirdi. Həmçinin 2010-cu ildən məndən ayrı yataqda yataraq bunun səbəbini uşağın ağlaması ilə izah etdi. Onun müxtəlif kişilərlə intim münasibəti yaşaması barədə məlumatım olmayıb. Bu barədə ilk dəfə istintaq dövründə polis bölməsində eşitmişəm".
"Baş çəkməyə getdiyini zənn etmişəm"
Hüquqi varisin sözlərinə görə, 31 oktyabr 2011-ci ildə gün ərzində İ.Q-nin əhvali-ruhiyyəsi yaxşı olmayıb və tez-tez yatmaq istədiyini bildirib: "F.M. ilə telefonla danışdı. O, evdə gözlədiyini, bir yerdə R.-gilə gedəcəklərini bildirdi.
Saat 20 radələrində müəllim evimizə gəldi, bir qədər oturub çay içdikdən sonra İ.Q. dostu ilə danışdı. Dostu yoldaşıma öz evinə çatdığını bildirdi.
Bundan sonra İ.Q. və F.M. birlikdə dostunun evinə gedəcəklərini bildirərək çıxdılar. Evdən çıxanda yoldaşım müəlliminə öz avtomobili ilə getmələrini təklif etsə də, o, yoldaşımın maşın sürməyindən ehtiyat etdiyini əsas gətirərək razılaşmadı. Yola çıxıb taksi ilə getməyi təklif etdi.
Ümumiyyətlə, bizim ailəmizlə R.-nin ailəsi yaxın münasibətdə olub. Həmin günlərdə R.nin ailəsi Londona getdiyinə görə evdə tək idi. İ.Q.-gil getdiklərinin səbəbini deməsələr də, R.-yə dost kimi baş çəkməyə getdiklərini zənn etmişəm".
Məhkəmənin hökmü ilə Əhəd 14 il müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.
