Mətn ölçüsü:
  • 100%

Bakıda studiyanı "alov götürdü": xanımı ilə dalaşan gənci öldürmək istədi... 

Əlbəyaxa olanları ayırmasaydılar, "Bakıda yanlış təşkilatçılığa görə qanlı olay" başlıqlı xəbərlər bəlkə də bütün saytları "bəzəyəcəkdi".

Söhbət fotostudiyalardan birinin Yeni il bayramı ərəfəsində qüsurlu təşkil etdiyi kampaniyadan gedir. Gəlirlərini ilin sonu daha da artırmaq və ya şirkətlərinin daha çox tanınması üçün endirim edirlər, amma idarəçilik sıfır... Tanıdırlar, amma mənfi mənada. Gəlirləri də artır, amma bu gedişlə növbəti dəfə müştərilər də azalacaq, nəticədə pulları da...

Bir az bu barədə danışdıqdan sonra idarəçiliyin nə qədər mühüm və zəruri olduğunu izah edəcəyəm.

Deməli, kim fotoxanaya zəng edib növbəyə yazılmaq istəyirsə, hamısını eyni vaxta təyin edirlər. Məsələn, 5 ailə saat 20:00-a növbə götürür. İşdən çıxıb qaçhaqaçla özünü studiyaya yetirir, baxır ki, baho, pavilyonda millət əlindən tərpənmək olmur. Yenə də hər şeyin yaxşı olacağına inanıb "indi növbəmiz çatanda, rahat şəkil çəkdirərik yəqin" deyə düşünür. Amma necə deyərlər, sən saydığını say, gör fələk nə sayır. 

Kiminsə dilindən yox, elə özüm şahid olaraq müşahidələrimi və gəldiyim qənaəti sizinlə bölüşəcəyəm. 

Şirkətin işçilərindən birinə yaxınlaşıb vəziyyətin nə yerdə olduğunu soruşdum. Sən demə, günahkarların hamısı müştərilər imiş. Fotoqrafların təbirincə desək, onlar özləri başqalarının vaxtına girirlər - paltarlarını dəyişəndə, uşaqları ağlayanda vaxt gedirmiş və məcbur başqaları da yazıldığı vaxta düşə bilmirlərmiş. Sonradan məlum olur ki, bayaq dediyim kimi özləri 5-6 ailəni eyni saata yazıblarmış. Elə hər şey də buradan başlayır.

Mən işçilərə izah etməyə çalışıram ki, onlar işi düzgün təşkil etməyiblər. Siyahı ilə hamının növbəsi tənzimlənməli, müştərilərin zövqlərinə görə seçiləcək dekorların qeydləri götürülməli, gecikənlərin vaxtından kəsilməlidir. Axı vaxtı əvvəldən müəyyənləşdiriblər. Gecikirsə, tam məsuliyyəti müştəri daşıyır. Hətta bu barədə əvvəlcədən müştəriyə demək olar ki, geciksələr, şirkət növbədə dəyişiklik edə bilər. Dediklərimin həm də özlərinə faydası olduğunu izah etməyə çalışıram. Çünki artıq ailələrin əsəbləri tarıma çəkilirdi. Dincəlməyə gələnlərin əksinə, bütün sinirləri pozulur. Nəhayət, idarəetmənin və təşkilatçılığın yanlışlığı "qısa qapanma" verdi. Studiyanı "alov götürdü". Ailələrdən biri yalnız şəkil çəkməklə məşğul olan və işin təşkilinə görə cavabdeh olmayan fotoqrafla söz davasına çıxdı. Nəticədə fotoqraf qadınla kobud danışdı, onun həyat yoldaşı müdaxilə etdi və fotoqrafla əlbəyaxa oldular. Enli kürək kişi çəlimsiz gənci az qalmışdı boğub öldürsün. Hətta küçəyə çıxardıb rahat döymək istəyirdi. O əsəblə küçəyə çıxsaydılar, döyməklə yox, bəlkə də döyə-döyə öldürməklə ürəyi soyuyacaqdı. Zatən əsəbi xarab olmuş adamlar yaxşı ki, onları ayıra bildi. Amma güclə...

Axı bir az hay-küy salanlar çox vaxt qanun-qayda olmayan yerdə qabağa düşə bilir. Mübahisələr həm də buna görə alovlanırdı.

Fotoqraflar ortada sözün əsl mənasında başlarını itirmişdi. Birtəhər ara sakitləşdi, yavaş-yavaş, müştərilər vəziyyətə uyğun hamıyla dil tapmağa çalışıb, özləri növbə düzəltdi.

Əlqərəz, müdrik birinin dediyi kimi, niyyətin, məramın xoş olsa da, haqlı tərəf olsan da, nizam-intizam yoxdursa, hansısa işində müvəffəq olmayacaqsan. Hətta rəqiblərin pis niyyətli, haqsız olsalar və nizam-intizam qaydalarına riayət etsələr, qələbə onlarındır. 

Bu, təcrübədən keçmiş və sübuta yetirilmiş qanundur.

Müəllif: Samir Mirzə

286089