“Hacı Nuranla şəkil çəkən ölür” mifinin sirri: “Fatihə”ni kim verir?
Ölkəmiz elə balacadır ki, bu tayda xırda bir yalan uydursan, hətta zarafatla hansısa bir sözü, cümləni dilə gətirsən, o tayında səs-sorağı yayılacaq. Özü də bir də gördün həqiqi, doğru, qərəzsiz, mötəbər informasiya şəklində xəbəri uydurana qayıdıb gəlib. İlkin versiyanı dillərə salan mənbə belə, şoka düşüb deyəcək: “Mən nağardım, a kişi, vallah, zarafat edirdim e”. Həəə, dilinin bəlasında düşən Əhməd əmi, dayı, kişi fərq etməz, işin işdən keçdiyini görüb artıq özü də uydurduğu məlumatın doğruluğuna iman gətirəcək. Axı gətirməsə, imanını yandırmış olar.
Ümumiyyətlə, uydurduğun məlumata özün inanmasan effektiv nəticə əldə edə bilməyəcəksən.
Məsələn, insanlar var ki, yalana, olmayan bir məfhuma, qeyri-reallığa özlərini inandıraraq çox xoşbəxt ola bilirlər. İnanc fəlsəfəsinin fenomenallığı da məhz bundadır. Hətta ona həqiqəti söyləyəndə cavabı belə olur: “İmkan ver, xoşbəxliyimizi yaşayaq. Sən nəyə nail olmaq istəyirsən? Gül kimi öz dünyam var, mənə travma yaşatma”. İnsafən deyək ki, həqiqətən, bəzən insanı xoşbəxt edən yalanlar da olur.
Adam da var ki, həyatı mifdən ibarətdir, ağzına nə gəldi danışır. Bildi, bilmədi bütün mövzulara fikir bildirməlidir, sanki bununla qidalanır. Özü də elə “tutarlı arqumentlər” gətirir ki, gəl görəsən. İstəyirsən üzünə baxıb deyəsən: “A kişi, haqq-hesaba basma”. Amma birdən deyirsən ki, bu boyda ssenari uydurana belə münasibət göstərsən, səni elə xıncım-xıncım edər ki, hətta əlini Qurana basıb inandığını söyləyərsən.
Hə, sözümün canı odur ki, bu cür məlumatlar insanlara, cəmiyyətə görə dəyişə bilər. Hansısa həqiqəti bar-bar bağırsan da, dəyişən heç nə olmayacaq. Yaxşısı budur, sən də iman gətir ki, rahatlıq tapasan.
Məsələn, hamımızın tanıdığı Hacı Nuranın adı elə çıxıb ki, onunla şəkil çəkdirmək bir çoxları üçün “riskovınnıdı, brat”. Bunun zarafat olduğunu bilənlər az deyil, amma “filankəsi Hacı Nuran apardı” deyib xoşhal oluruq. İfrata yol verdiyimizin fərqində vardıqda bu haqda düşünməyə başladım. Çünki bu yaxınlarda Hacı Nuranla şəkil çəkdirdim və “var belə ürəkli oğlanlar” şərhi ilə paylaşdım. İnanın ki, çox ciddi bildiyim insanlar, sadəcə, baxıb və ya layk atıb keçə bilmədilər. Elə münasibət göstərdilər ki, az qala özüm də düşünüm ki, “bu gün-sabahlığam”, gedirəm o tərəfə. Ciddi-ciddi məni qısamüddətli təsirə saldılar.
İş orasındadır ki, Hacı Nuranın aktiv həyatı olduğu üçün, tez-tez tədbirlərdə iştirak etdiyinə görə şəxsi fotoqrafı onun bir çox insanlarla şəklini çəkir. Günün birində həmin adamlar dünyadan köçür və Hacı ilə şəkilləri paylaşılır. Nəticədə qeyd edilən mif yaranır. Amma yada salaq ki, Hacı Nuran ilk dəfə insanlara “ikinci həyat verən persona” kimi tanınmışdı. Hələ indi də efirlərdən birində oxşar formatda verilişi yer alır.
Təsəvvür edin, iş o yerə çatıb ki, insan “Qalatasaray”ın formasını geyinir, klubun Türkiyə çempionatında uduzacağını deyirlər. Təbii ki, açıq-aydın zarafatdır, amma belə başa düşürəm ki, buna inananlar da az deyil.
Acun İlıcalının da ölkəyə gəlişini xatırlayaq. Məşhur iş adamının tədbirini uğursuz adlandıranlar arasında bunu Hacı Nuranla birgə görüntülənməsi ilə əlaqələndirənlər oldu. Və xəbər saytlarının birində belə başlıqda məqalə dərc olundu: “Acunun Bakıda çəkilən FOTOsunda diqqət çəkən məqam - Tanınmış şəxs...”
Daha bu qədər də yox, bəlkə artıq həddi aşırıq və qarşı tərəfi narahat edirik?
Özünün yaranmış vəziyyətə verilişlərdən birində reaksiyası bu cür olub: “Bundan incimirəm. Bizdə müəyyən bir şey çox tez trendə düşür. Parisdəki Notr-Dam kilsəsi önündə şəklim var idi. Ora yananda tez haradansa şəkli tapdılar. Montaj etdilər: bina yanır, mən də yanında dayanmışam”.
Hacı Nuran hətta veriliş aparıcısının şəkil çəkdirmək istəyinə “ölmək istəmirsinizsə, çəkdirək”, - deyə cavab verib.
Zəruri qeyd kimi yazım, burada qalsın: ümumiyyətlə, insan taleyini düşüncələri ilə müəyyən edir. Nəyə inandın, nəyi arzuladın, niyyətin nə oldusa, onu da alacaqsan. Dəfələrlə şahidi olmuşam və olmaqdayam. Məsələn, neqativ hadisəyə “Həyatdakı şansım” deyib qiymət verməklə və buna fokuslamaqla öz “Fatihə”ni vermiş olursan.
Samir Mirzə Miri
Ölkə.Az
